ქართული ინდი-როკ ჯგუფი Bedford Falls მსმენელს ახალი მუსიკით უბრუნდება. ბენდის გულშემატკივრებს, შესაძლოა, ეს სიმღერა ლაივ კონცერტებიდან გეცნოთ, ხოლო მათთვის, ვისაც სიმღერა ჯერ კიდევ არ მოგვისმენია, ბენდმა განსაკუთრებული საჩუქარი გაგვიკეთა და ცოტა ხნის წინ მისი სტუდიური ვერსია შემოგვთავაზა. ახალ სინგლთან დაკავშირებით კომენტარი დათო ჯიქიას ვთხოვეთ:

"Ultramarine დიდი ხანია ჩვენს არსენალშია და მხოლოდ ახლა დავარელიზეთ. არადა მგონი 2020 წლის პერიოდში დაიწერა. ეს თითქოს ჩვენი კლასიკური განწყობის ტრეკი უნდა ყოფილიყო, მელანქოლიური და ატმოსფერული. ასევე გვინდოდა, რომ სიმღერისთვის რეტრო ჟღერადობა მიგვეცა, როგორც, მაგალითად, ჩვენს ძველ სიმღერაში post soviet post mortem", — ამბობს On.ge-სთან ჯგუფის წამყვანი ვოკალისტი, დათო ჯიქია.

სინგლის მოსმენა როგორც იუთუბზე, ასევე Spotify-ს, Apple Music და Deezer-ს მუსიკალურ პლატფორმებზე არის შესაძლებელი.

Bedford Falls არა მხოლოდ მუსიკით, არამედ უჩვეულო ანიმაციებითაც არის გამორჩეული. დათო ჯიქიას თქმით, Ultramarine-ს ულამაზეს ვიზუალზე მულტიმედია არტისტმა — თიბათვემ იზრუნა.

ვინ არის თიბათვე?

თიბათვე, იგივე, თიკო ხარხელაური — მხატვარი და მულტიმედია არტისტია. ამჟამად, მისი ნამუშევრების ნახვა The Why Not Gallery-ში არის შესაძლებელი.

Ultramarine არ არის თიბათვისა და Bedford Falls-ს პირველი თანამშრომლობა. მის ანიმაციებს ვხვდებით ისეთ სიმღერებში როგორებიცაა — Habla Buddha, KINO-ს რემიქსში, თიბათვე ასევე იყო სასცენო დიზაინერი კლიპისთვის — Miende.

"თიბათვეს ჩვენთვის უკვე არაერთი ვიზაული გაუკეთებია, მათ შორის ანიმაციურიც და ვიფიქრეთ, რომ ამ განწყობის სიმღერას ლამაზი, წრიული ანიმაცია მოუხდებოდა", — ამბობს დათო ჯიქია.

ფოტო: Kordz/IG

"თიბათვეს აზრით, სიმღერის ატმოსფეროს ზღვის ტალღები მოუხდებოდა, რადგანაც სიმღერას, Ultramarine ჰქვია, ხოლო ანიმაციური ცახცახი და დინამიური გამოსახულება რეპერტუარის მოსმენის გამოცდილებას კიდევ უფრო ალამაზებს", — ამბობს ბენდის ვოკალისტი.

შეგახსენებთ, რომ ჯგუფი Bedford Falls 2014 წელს ჩამოყალიბდა და მათმა სადებიუტო ალბომმა — This Is Your House დღის სინათლე 2019 წელს იხილა, ხოლო ბოლო ალბომი miende. ბენდმა მსმენელებს 2023 წელს შესთავაზა.

Bedford Falls გასულ წელს კონცერტი ჰქონდა ევროპულ ქალაქებშიც. Calypso-ს ტურნემ სტარტი 2024 წლის 28 ივნისს Inne Brzmienia-ს ფესტივალზე აიღო, ხოლო კონცერტები 21 ივლისს ვენაში დასრულდა.

ფოტო: Straus Entertainment

ბენდის ვოკალისტის ცნობით, ისინი ახალ სიმღერებზე მუშაობენ, ჯერჯერობით არ იციან, მას ალბომის ფორმა ექნება თუ EP-ს, შესაძლოა, როგორც Ultramarine — ისინიც სინგლებად გამოუშვან.

გვინდა, ჩვენმა მსმენელმა იცოდეს, რომ წინ კიდევ უამრავი სიმღერა ელით, ზოგი ძველი ჟღერადობის, ზოგიც სრულიად უცხო

— გვეუბნება დათო ჯიქია.

სანამ ბენდი ახალ სიმღერებს შემოგვთავაზებს, მათ მოსმენას გულშემატკივრები 21 ივნისს, Ciskari Garden-ში შეძლებენ.