ევროპული საქართველოს მაჟორიტარობის კანდიდატი საჩხერის, ჭიათურისა და ხარაგაულის ოლქში, სერგო რატიანი, ხელისუფლების მიერ საჯარო სკოლის დირექტორების განთავისუფლებას ეხმაურება

სერგო რატიანის თქმით, ხელისუფლება წინასაარჩევნოდ, შერჩევითი სამართლით ათავისუფლებს სკოლის დირექტორებს და ნიშნავს საკუთარ რჩეულ დირექტორებს ამ პოზიციაზე. რატიანმა აღნიშნა, რომ ია კერზაიას საქმეზე ხელისუფლების წარმომადგენლების დაუსჯელობამ წაახალისა ამგვარი ზეწოლა სკოლის დირექტორებზე.

"ხელისუფლებამ გაათავისუფლა ყველა ის სკოლის დირექტორი, რომელიც დანიშნული იყო 2014 წელს. მათ არ ჩაატარეს წელს ატესტაცია, რითაც მოუსპეს საშუალება ყოფილ სკოლის დირექტორებს, გასულიყვნენ კონკურში და მისცემოდათ საშუალება მეორედ ყოფილიყვნენ არჩეულნი. სამაგიეროდ, მათ რჩეულ დირექტორებს ნიშნავენ ფაქტობრივად მოვალეობის შემსრულებლად, რაც არის შერჩევითი სამართალი და არის პროტექციონიზმი. უნდა ითქვას ასევე, რომ ეს არის შედეგი იმისა, რომ ია კერზაიას ტრაგედიის შემთხვევაში, ხელისუფლების წარმომადგენლები დარჩნენ დაუსჯელები და ახლა ფართომასშტაბიან შეტევას ახორციელებენ სკოლის დირექტორებზე. ეს ხდება ყველგან და აჩვენებს იმას, რომ ხელისფულება გრძნობს რომ აგებს არჩევნებს და აქვთ სრული აგონია", — განაცხადა სერგო რატიანმა.