გაფრთხილება: მასალა შეიცავს მძიმე ფოტოს.

Current Time-ის ცნობით, ბელარუსის მოქმედმა პრეზიდენტმა, ალექსანდრე ლუკაშენკომ რუსულ მედიასთან განაცხადა, რომ ძალოვნებთან დაშავებული პირები სხეულს ლურჯი საღებავით იღებავენ. ოკრესტინას წინასწარი დაკავების იზოლატორიდან გამოსული ადამიანები ძალოვნების მიერ ხელკეტებით ნაცემ სხეულს მედიის საშუალებით საზოგადოებას ხშირად აჩვენებენ. ლუკაშენკომ კი სხეულზე დაზიანებების გაყალბებაში აქციის დროს დაკავებულები დაადანაშაულა.

"39 თუ 40-მდე ბიჭები [ომონი] ხერხემალ დამტვრეულები წვანან საავადმყოფოში. ნაწილი მათგანი ფეხზე ვერასდროს დადგება და რას შეეწირნენ ეს ადამიანები? იმას რომ თავიანთი ქვეყანა გადაარჩინეს და წესრიგი დაამყარეს? მე არ შემიძლია განვსაჯო ისინი, რომლებმაც არა მარტო ქვეყანა, არამედ მეც დამიცვეს", — განაცხადა ლუკაშენკომ.

აქციებზე დაკავებულებზე საუბრისას, მან, ასევე, თქვა, რომ 60% მათგანი ნასვამი და ნარკოტიკული თრობის ქვეშ იყო.

ლუკაშენკოს მხრიდან საპროტესტო აქციის მონაწილეებზე განხორციელებული ფიზიკური ძალადობის ფეიკად მოხსენიება, პირველი შემთხვევა არაა. მანამდე მან, ასევე, აღნიშნა, რომ მიტინგის დაშლის დროს ძალოვნების მიერ დაზარალებულ მსხვერპლთა ფოტოების 60%, სავარაუდოდ, დაიდგა.

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ. შედეგებს მოსახლეობის დიდი ნაწილი და ოპოზიცია არ აღიარებს.

ბელარუსში მიმდინარე მასობრივი გამოსვლებისა და აქციების პარალელურად, ლუკაშენკო ძალაუფლების დათმობას არ აპირებს და დახმარებას პუტინს სთხოვს, რომელიც, თავის მხრივ, ტრადიციულ მეთოდს იყენებს და ლუკაშენკოს კოლექტიური სწრაფი რეაგირების ძალებით დახმარების პირობა მისცა, რომელიც სამხედრო გაერთიანებაა და მის შემადგენლობაში 18 000 ადამიანია.

ფოტო: AFP

ბელარუსში საპროტესტო გამოსვლები საპრეზიდენტო არჩევნებს მოჰყვა. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.