სინგაპურმა სულ რაღაც 55 წლის წინ გამოაცხადა დამოუკიდებლობა, თუმცა ამ დროში კუნძულოვანმა სახელმწიფომ მსოფლიოში ერთ-ერთი ყველაზე ძლიერი და გარემოსადმი პასუხისმგებლიანი ეკონომიკის შექმნა მოახერხა. სინგაპურის თვალისმომჭრელ საქმიან რაიონში სიარულისას აუცილებლად შეხვდებით გარემოსთან მეგობრულ არქიტექტურას, რომელიც მინის, ლითონისა და აყვავებული მცენარეების ერთობლიობით სტრუქტურული დიზაინის მდიდრულ პანორამას ქმნის. თანაც, საგულისხმოა, რომ ამ შენობების უმეტესობა გასულ ათწლეულში აიგო.

არქიტექტურული საოცრებების გარდა სინგაპურის ურბანულ განაშენიანებას მწვანე ინიციატივებისადმი ერთგულებაც გამოარჩევს. ამ სტატიაში გაჩვენებთ 8 შენობას, რომელიც ამ ერთგულების ცალსახა დასტურია.

1. Oasia Hotel Downtown

გარდა იმისა, რომ მთელი 27-სართულიანი გარე ფასადი ბუნებრივი ვაზითაა "შეფუთული", Oasia Hotel Downtown-ს ასევე ოთხი აყვავებული ტერასა, 1,793 საყვავილე ყუთი და ოთხი დიდი სტრუქტურული ბირთვი აქვს, რომელიც ჯვარედინი ვენტილაციის და შესაბამისად, ენერგიის დაზოგვის საშუალებას იძლევა.

2. Gardens by the Bay

სინგაპურის ერთ-ერთმა ყველაზე მიმზიდველმა ადგილმა Gardens by the Bay-მ გახსნიდან (2011 წ.) დღემდე მისი მდგრადობისა და ამბიციური დიზაინის გამო შექება არაერთხელ დაიმსახურა.

250 ჰექტარზე გაშენებულ ბაღებში ორ სათბურს შეხვდებით, რომლებიც კლიმატ-კონტროლის მქონე ყველაზე დიდი სათბურებია მსოფლიოში. აქვეა 18 "სუპერ-ხის" (Supertree) ტყეც, სადაც თითოეული "ხის" სიმაღლე 25-დან 50 მეტრამდეა. სუპერ-ხეებში ჩაშენებულია სხვადასხვა ტექნოლოგიები, მათ შორის ფოტოელექტრული მზის სისტემა — ესაა ხეების სტრუქტურაში გაყვანილი გამაგრილებელი არხები, რომლებიც მიმდებარე გარემოს ტემპერატურისა და კლიმატის დასაბალანსებლად გამოიყენება.

3. Parkroyal on Pickering

ეს 637-ნომრიანი სასტუმრო მცენარეებით სავსე გარე მოედნებითა და ტერასებით ნამდვილად თვალისმომჭრელია. შენობაში წვიმის სენსორები, მზის პანელები, წყლის შემნახველი და სინათლის დამზოგავი ტექნოლოგიებია ჩაშენებული. მისი მშენებლობისას კი ბეტონი მცირე რაოდენობით გამოიყენეს. სასტუმროში 50 ათასამდე კვადრატული მეტრის ბაღები, ჩანჩქერები და საყვავილე კედლებია, რომლებიც მთლიანი მიწის ფართობზე ორჯერ მეტ სივრცეს იკავებს.

4. სინგაპურის ეროვნული გალერეა

მე-20 საუკუნის დასაწყისის ორი კლასიკური ღირშესანიშნაობა — მერია და უზენაესი სასამართლო — მინისა და ფოლადის კომპლექსური "ფარდის" გამოყენებით გააერთიანეს, 211 000 კვადრატული მეტრამდე ფართობზე სინგაპურის ეროვნული გალერეა შექმნეს. ეროვნული გალერეა 2015 წლის ბოლოდან დღემდე სინგაპურსა და სამხრეთ-აღმოსავლეთ აზიაში თანამედროვე ხელოვნების ყველაზე დიდ კოლექციას ინახავს.

გალერეის ჩარდახი ხის მსგავსი სტრუქტურით სახურავიდან შემოსულ ბუნებრივ შუქს არბილებს და ფილტრავს. StudioMilou-მ, CPG კონსულტანტებთან თანამშრომლობით, ყოფილი მერიის ეზოში მინის დახურული ბაღები მოაწყო. ტემპერატურის შესანარჩუნებლად კი ბუნებრივ სინათლეს სახურავზე მოწყობილი ამრეკლავი აუზებით "ფილტრავენ".

5. Asia Square

Asia Square 2011 წლიდან სინგაპურში გაყიდვებისა და საოფისე შენობებს შორის ყველაზე მწვანედაა დასახელებული. 43-სართულიანი ცათამბჯენი, რომელშიც 305-ნომრიანი სასტუმროცაა განთავსებული, სტანდარტულ კომერციულ შენობებთან შედარებით 35%-ით ნაკლებ ენერგიას მოიხმარს.

აქ რამდენიმე ინოვაციურ ტექნოლოგიას შეხვდებით. ლიფტების მიერ გამოყოფილი კინეტიკური ენერგია ელექტრულ ენერგიად გარდაიქმნება და სისტემაში გადანაწილდება, ასევე, წყლისა და ორთქლის წვეთებს საჰაერო განყოფილებებიდან აგროვებენ და მწვანე საფარის მოსარწყავად იყენებენ.

6. CapitaGreen

CapitaGreen-ის ფასადის ნახევარი მცენარეებითაა დაფარული, ხოლო დანარჩენი ფასადი მინის ისეთი კონსტრუქციითაა აგებული, რომ ერთდროულად მზის სითბოც რეგულირდება და მცენარეებისთვის სათბურის ეფექტიც იქმნება.

7. Kampung Admiralty

Kampung Admiralty მსოფლიოს არქიტექტურულ ფესტივალზე, 2018 წელს, წლის საუკეთესო შენობად აღიარეს.

სინგაპურის ასაკოვანი მოსახლეობის საჭიროებების დასაკმაყოფილებლად აშენებულ დაწესებულებაში, პირველ საქართულზე, საზოგადოებრივი პლაზა, შუა ნაწილში — სამედიცინო დაწესებულება, ხოლო ზედა სართულებზე ხანდაზმულებისთვის განკუთვნილი საცხოვრებელი ბინებია განთავსებული.

8. ნანიანგის ტექნოლოგიური უნივერსიტეტი, ხელოვნების სკოლა

ნანიანგის ტექნოლოგიური უნივერსიტეტის სამხატვრო, დიზაინისა და მედიის სკოლის შენობის გამორჩეული დეტალი მწვანე სახურავია, რომელიც თითქმის 45-გრადუსიანი კუთხის დახრილობისაა. ამით ის ამცირებს როგორც სახურავის, ისე გარემოს ტემპერატურას და შენობაში ჰაერის კონდიცირებას უწყობს ხელს.

შენობაში ასევე შეხვდებით ეზოს წყალსატევებით და მცენარეებით, რომელთაც დიდი ფანჯრები ირეკლავს და სტუდენტებისთვის დამამშვიდებელ გარემოს ქმნის.