საქართველოს ექსპრეზიდენტმა, ამჟამად უკრაინის რეფორმების ასოციაციის თავმჯდომარემ და ერთიანი ნაციონალური მოძრაობის პრემიერობის კანდიდატმა, მიხეილ სააკაშვილმა მორიგი წინასაარჩევნო ვიდეომიმართვა გაავრცელა, რომელშიც დაპირებებიც გააჯღერა. ტრადიციულად, სააკაშვილმა საქართველოს მონატრებაზე ისაუბრა და დაპირდა ამომრჩეველს ემიგრანტების ქვეყანაში დაბრუნებას, განათლებისა და ჯანდაცვის სისტემის ხარისხის გამოსწორებას და მდიდარი ქვეყნის შექმნას დაპირდა.

ამავე ვიდეომიმართვაში, მან ისევ მოუბოდიშა საზოგადოებას წარსულში დაშვებული შეცდომების გამო და განაცხადა, რომ "გამოსასწორებლად" შანსი სჭირდება. რაც შეეხება გამოსწორების გზას, ის სამომავლოდ სასამართლო სისტემის ხელისუფლებისგან დაცვისა და საგამოძიებო უწყებების სახელისუფლებო კონტროლისგან ჩამოშორების პირობას დებს.

ის ამტკიცებს, რომ პრემიერობა მხოლოდ 2 წლით სურს და ეს საკმარისი იქნება "ქვეყნის ჭაობიდან ამოასთრევად". მისი თქმით, ამ პერიოდში შეცვლის საგამოძიებო და სასჯელაღსრულების სისტემას. კერძოდ, სააკაშვილი ამტკიცებს, რომ პოლიცია მხოლოდ ფორმალურად უნდა დარჩეს შინაგან საქმეთა სამინისტროს შემადგენლობაში და მისი პრემიერობის დროს, პოლიციის უფროსებს სამოქალაქო კონსენსუსით აირჩევენ, რომელსაც პარლამენტში ოპოზიციის ხმების მინიმუმ 1/3 დასჭირდება. მისივე გეგმებით, სასჯელაღსრულების სისტემა უნდა გამოეყოს იუსტიციის სამინისტროს და ხელმძღვანელიც იმავე პრინციპით უნდა შეირჩეს, როგორც პოლიციის უფროსი.

ვიდეომიმართვაში სააკაშვილი ამტკიცებს იმასაც, რომ თავად უსამართლო სასამართლო გამოსცადა, ამიტომ სურს ეს სისტემაც შეცვალოს. ამავდროულად, ის აღიარებს, რომ სასამართლო გადაწყვეტილებებში მისი ხელისუფლების დროსაც ერეოდნენ, რაც ცუდია.

სააკაშვილი ამომრჩეველს პირდება იმასაც, რომ მოსმენების ინსტიტუტის ბერკეტის გამოყენება მხოლოდ სასამართლოს ექნება, რასაც სახალხო დამცველი გააკონტრლებს. მისივე მტკიცებით, სუსი საერთოდ გაუქმდება და დარჩება მხოლოდ კონტრდაზვერვა, რომელიც არ შეეხება შიდა პოლიტიკას.

სააკაშვილმა საკუთარი რეფორმირების გეგმა წარადგინა ბიზნესში სახელმწიფოს ჩარევის პრევენციის კუთხითაც და თქვა, რომ ამას საგადასახადო მუხლის დეკრიმინალიზება სჭირდება. მისი თქმით, ასე ბიზნესში ჩარევის ინსტრუმენტები აღარ ექნება სამართალდამცავ სისტემას.

ვიდეომიმართვაში სააკაშვილმა განაცხადა ისიც, რომ გეგმავს ისეთ დროს ჩამოვიდეს, როცა არეულობას არ გამოწივევს. როდის იქნება ასეთი დრო მას არ დაუკონკრეტებია. პრემიერობის კანდიდატს არც იმაზე უსაუბრია, შექმნის თუ არა კოალიციას სხვა პარტიებთან ან დაუჭერს თუ არა სხვა კანდიდატებს მხარს.

გაიგეთ მეტი:

სააკაშვილმა საქართველოში დაბრუნება არაერთხელ დააანონსა. მათ შორის, ექსპრეზიდენტი აქტურად პირდებოდა მოსახლეობას დაბრუნებას წინასაარჩევნო პერიოდებში, თუმცა ამ დრომდე არ ჩამოსულა. მის წინააღმდეგ საქართველოში რამდენიმე სისხლის სამართლის საქმეზე განაჩენია გამოტანილი და ის დამნაშავედაა ცნობილი.

წინასაარჩევნო პერიოდში მორიგი დაპირების გაჟღერების შემდეგ, მმართველ გუნდში, ქართულ ოცნებაში განაცხადეს, რომ მიხეილ სააკაშვილს საქართველოში ჩამოსვლის შემთხვევაში ციხე ელის.