მოკლედ: დღეს, 2024 წლის 1-ელ მაისს, საქართველოს პარლამენტმა რუსული კანონი მეორე მოსმენით მიიღო.

კანონპროექტს მხარი დაუჭირა 83-მა დეპუტატმა, 23 წინააღმდეგი იყო.

საქართველოში რუსული კანონპროექტის კანონად ფორმირების მხარდამჭერია პარტია ქართული ოცნების საპარლამენტო უმრავლესობა. კენჭისყრას წინ უძღოდა 2-დღიანი მუხლობრივი განხილვა პლენარულ სხდომაზე.

კენჭისყრა რამდენიმე წუთის წინ დასრულდა.

  • 2024 წლის 17 აპრილს, საპარლამენტო უმრავლესობამ რუსულ კანონს პირველი მოსმენით დაუჭირა მხარი, 83 ხმით 0-ის წინააღმდეგ.

ნახეთ: დეპუტატების სია — ვინ მიიღო საქართველოში რუსული კანონი პირველი მოსმენით

  • ხელისუფლების დაჟინებულ სურვილს, მიიღოს საქართველოში რუსული კანონი, ხალხი აპროტესტებს დღესაც. დემონსტრანტებმა პარლამენტის შენობის ირგვლივ შეკრება 17:00 საათიდან დაიწყეს.
  • აქციის მონაწილეები შეკრებილი არიან როგორც პარლამენტის შენობის წინ, ასევე, შენობის შესასვლელებთან.
  • საკანონმდებლო ორგანოს შენობის ეზოშიც და შენობის ირგვლივაც მობილიზებული არიან საპოლიციო ძალები.

პროცედურულად: ზოგადად, კანონპროექტის კანონად ფორმირებისთვის, დეპუტატების სამი მოსმენით მხარდაჭერაა საჭირო პლენარულ სხდომაზე.

  • რუსული კანონის საბოლოო, მესამე მოსმენით მხარდაჭერის სავარაუდო თარიღად პარლამენტმა 17 მაისი განსაზღვრა.
  • კანონი, მიღების შემთხვევაში, პრეზიდენტს გადაეგზავნება.
  • სალომე ზურაბიშვილი აცხადებს, რომ რუსულ კანონს ვეტოს დაადებს. თუმცა, ამის შემდეგ, საპარლამენტო უმრავლესობა ვეტოს დაძლევას შეეცდება, რადგან მას ვეტოს დასაძლევად საკმარისი მანდატი აქვს.

2024 წლის 3 აპრილს ოცნებამ განაცხადა, რომ ისევ აპირებს იმავე რუსული კანონის კანონის მიღებას, რამაც მასშტაბური სახალხო წინააღმდეგობა გამოიწვია გასული წლის მარტში.

8 აპრილს, პარლამენტის ბიუროს სხდომაზე განხილვის შემდეგ, რუსული კანონი დარეგისტრირდა.