მოკლედ: საქართველოს სახალხო დამცველი ლევან იოსელიანი შინაგან საქმეთა სამინისტროს მოუწოდებს, "არ გაიმეოროს ის, რაც ჩვენ გუშინ ვიხილეთ, არ ჩაერიოს ჩვენი მოქალაქეების გამოხატვის თავისუფლებაში, არ იძალადოს მათზე".

  • ამის შესახებ იოსელიანმა დღეს, 1-ელ მაისს გამართულ ბრიფინგზე განაცხადა.

დეტალები: იოსელიანმა, დაკავებულებთან გასაუბრების და საჯაროდ ხელმისაწვდომი ვიდეოჩანაწერების გაცნობის შედეგად, ბრიფინგზე შეფასება გააკეთა.

  • მისი თქმით, სამართალდამცავებმა აქციის მონაწილეების მიმართ რამდენჯერმე გამოიყენეს ე.წ წიწაკის სპრეი, რისი აუცილებლობაც, არცერთ შემთხვევაში არ არსებობდა: "გავრცელებული ინფორმაციით დგინდება, რომ აქციის მონაწილეები სპეციალური საშუალების გამოყენების თაობაზე არ გაუფრთხილებიათ წინასწარ".
  • ასევე, იოსელიანმა განაცხადა, რომ ადმინისტრაციული შენობის შესასვლელების გათავისუფლება, შეიძლება იყოს ლეგიტიმური მოთხოვნა, თუმცა, მთავარია გათავისუფლებისას გამოყენებული ძალა იყოს აუცილებელი და პროპორციული, რაც მისი დაკვირვებით, ცალკეულ შემთხვევებში სახეზე არ იყო.

კონტექსტი: რუსული კანონის მოწინააღმდეგეთა აქცია გუშინ სპეცრაზმმა რამდენჯერმე დაარბია.

  • ფიზიკურად გაუსწორდნენ აქციის მონაწილეებს.
  • გაუფრთხილებლად გაუშვეს ცრემლსადენი გაზი.
  • არიან დაშავებულები, მათ შორის ჟურნალისტები და ასევე, დეპუტატი ლევან ხაბეიშვილი.
  • შსს-ს ინფორმაციით, აქციაზე 63 ადამიანი დააკავეს.
  • პარლამენტი რუსულ კანონზე მსჯელობს, კენჭისყრა, სავარაუდოდ, დღეს იქნება და ოცნება კანონპროექტს მეორე მოსმენით მიიღებს.