მოკლედ: "მოვედით, რათა მოვუსმინოთ საგარეო საქმეთა მინისტრს. საქართველოს მარიონეტულმა ხელისუფლებამ პარლამენტს დაადო ბოქლომი, გადამალა საგარეო საქმეთა მინისტრი და შეშინებულებმა ფაქტობრივად გააუქმეს ჩვენი საკანონმდებლო ორგანოს მუშაობა", — თქვა რომან გოცირიძემ ევროოპტიმისტებიდან, საქართველოს პარლამენტის დალუქულ ჭიშკართან გამართულ ბრიფინგზე.

• მას შემდეგ, რაც ოპოზიციონერმა დეპუტატებმა პარლამენტში შესვლა ვერ შეძლეს, მედიისთვის ბრიფინგი გამართეს.

რა მოხდა: დღეს, 2 მაისს, პარლამენტმა გააუქმა პლენარული სხდომა, გაუქმებულია საგარეო საქმეთა მინისტრის, ილია დარჩიაშვილის მოხსენებაც.

• საკანონმდებლო ორგანომ წითელი ზონა გამოაცხადა და იუწყება, რომ "ამ დროისთვის საქართველოს პარლამენტის სასახლეში, შესაბამის სტრუქტურებთან ერთად მიმდინარეობს გაწმენდითი და აღდგენითი სამუშაოები". [მეტი]

ოპოზიციონერი დეპუტატების გზავნილები მთავრობას

• რომან გოცირიძე: "აი, ეს არის კომიკური, მარაზმატული ხელისუფლება. ხელისუფლებას, რომელიც დაუპირისპირდება ხალხს, მარცხდება. შეშინებულმა ივანიშვილმა მოინდომა, პარლამენტი საკუთარ ციხე-სიმაგრედ გადააქციოს, მაგრამ ქართული ოცნების დეპუტატები ვერც შიგნით შემოდიან და ვერც გარეთ გამოდიან სპეცრაზმის გარეშე. ასეთი ცხოვრება ექნებათ მანამ, სანამ არ გააუქმებენ ამ კანონს. ყველაფერი წინა არის. მესამე მოსმენა წინ გვაქვს."
• სალომე სამადაშვილი: "მე ილია დარჩიაშვილს ერთადერთ რამეს ვეტყვი, დაწერე განცხადება და გადადექი იმიტომ, რომ ეს ხელისუფლება ითვლის საკუთარი არსებობის უკანასკნელ თვეებს და შენ, შენს ბიოგრაფიაში ის მაინც შეგრჩება, რომ ხელი არ მოაწერე ქვეყნის ღალატს გადამწყვეტ მომენტში. დაწერე განცხადება და წადი სახლში!"
• ხატია დეკანოიძე: "დღეს იყო დაგეგმილი სხდომა და განსაკუთრებით მნიშვნელოვანი იყო საგარეო საქმეთა მინისტრის მოსმენა, ვინაიდან საკითხი ევროატლანტიკური კურსიდან გადახვევას ეხება მას შემდეგ, რაც გუშინ ოთხმოცდასამივე დეპუტატმა მხარი დაუჭირა რუსულ კანონს."

ამ თემაზე: საქართველოს დასავლური კურსი საფრთხეშია — სახელმწიფო დეპარტამენტი

• "ვფიქრობ, მათ გათვითცნობიერებული აქვთ, რომ სპეცრაზმის გარეშე გადაადგილებაც არ შეუძლიათ, ახლა საპარლამენტო დარბაზში გამოჩენაც ეშინიათ მაშინ, როდესაც რიცხობრივად მეტი არიან", — თქვა ხატია დეკანოიძემ და მოუწოდა მოქალაქეებს, დღესაც მივიდნენ პარლამენტთან პროტესტისთვის 19:00 საათზე. "დღეს 19:00 საათზე კვლავ პარლამენტთან არის პროტესტი და შევიკრიბოთ ყველა ერთად, რათა საქართველოს გეოპოლიტიკური არჩევანი რუსეთი არ იყოს."

• თინა ბოკუჩავა: "ვერშემდგარი, შეშინებული დიქტატორი ივანიშვილი თავისი მხდალი, მოღალატე დეპუტაციით, რომელიც გუშინ პარლამენტის შენობიდან მორიგ ჯერზე სპეცრაზმმა გააპარა, დღეს საერთოდ ვერ ბედავს პარლამენტის შენობის გახსნას. აქამდე ჩვენ გვაძევებდნენ პარლამენტის შენობიდან, ახლა თავადვე გაიძევეს თავი, რადგან ქართველი ხალხის ეშინიათ იმიტომ, რომ ხედავენ, ხალხი არ აპირებს დათმოს ამ ქვეყნის მშვიდობიანი, ევროპული, დემოკრატიული განვითარების შანსი და სწორედ ამის დასაცავად გამოდის ყოველდღე."

ბოლო ხაზი: პარლამენტის მიერ დღეს დილით გავრცელებული განცხადების თანახმად, წითელი დონის გაუქმების შემდეგ, მოქმედებას დაიწყებს ყვითელი დონე, რა დროსაც ვიზიტორებს ეზღუდებათ პარლამენტის სასახლეში შესვლა. შენობაში დაიშვებიან მხოლოდ საქართველოს პარლამენტის თანამშრომლები.