მოკლედ: საქართველოს ახალგაზრდა იურისტთა ასოციაცია (საია) მოუწოდებს შინაგან საქმეთა სამინისტროს, უარი თქვას კანონსაწინააღმდეგო, ადამიანის უფლებების დაცვასთან შეუთავსებელ და ღირსების შემლახავ ძალადობრივ პრაქტიკაზე.

  • ასევე, საია მიმართავს სპეციალური დანიშნულების რაზმის თანამშრომლებს: არ დაემორჩილონ უკანონო ბრძანებებს და არ გამოიყენონ ძალადობრივი მეთოდები მშვიდობიანი დემონსტრანტების წინააღმდეგ.

დეტალები: საიას მიხედვით, 1-ელ მაისს, დაახლოებით 22:00 საათიდან, შეინიშნებოდა აქტიური სპეციალური საშუალებების, წიწაკის სპრეის, ცრემლსადენი გაზის, რეზინის ტყვიების, წყლის ჭავლის გამოყენება.

  • "თავდაპირველად, აქტიური სპეციალური საშუალებების გამოყენებას ჩიტაძის ქუჩაზე წინ უძღოდა რამდენიმე პირის მიერ ჭიშკრის უჯრედებზე ჩაჭიდება და ხმაურით პროტესტის გამოხატვა, ხოლო, შემდეგ საშუალებების გამოყენება უკვე გადაიზარდა დემონსტრანტების ფართო მასების მიმართულებით".

საიას ინფორმაციით, გამოყენებულ სპეციალურ საშუალებათა უკანონო პრაქტიკებს შორის, განსაკუთრებით საგანგაშოა:

  • რეზინის ტყვიების გამოყენება ახლო მანძილიდან, სასიცოცხლო ორგანოების (სახის, მუცლის არის) მიმართულებით ან/და იმ პირთა მიმართ, რომელთაგანაც არ მომდინარეობდა საფრთხე;
  • ცრემლსადენი გაზის სროლა სახურავიდან ქვემოთ, მშვიდობიანად მდგომი ხალხის მიმართულებით რუსთაველის გამზირზე, რაც არღვევს ცრემლსადენი გაზის კაფსულების გამოყენების წესს და ცხელი კაფსულის მოხვედრის შემთხვევაში, ქმნის სიცოცხლისა და ჯანმრთელობისთვის შეუქცევადი დაზიანების საფრთხეს.

გაიგე მეტი: საია: საქართველოს პარლამენტთან აქციის დარბევა უკანონოა

კონტექსტი: 1-ელ მაისს, რუსული კანონის საპროტესტო აქციაზე, 9 აპრილის ქუჩაზე, გაუშვეს ცრემლსადენი გაზი და წყლის ჭავლი. გამოიყენეს რეზინის ტყვიებიც.

  • სპეციალური საშუალებები, მოქალაქეების წინააღმდეგ, გაფრთხილების გარეშე გამოიყენეს.

გაიგე მეტი: მოვუწოდებთ, შეწყვიტონ ძალადობა, წინააღმდეგ შემთხვევაში სპეციალური საშუალებებით შევწყვეტთ აქციას — შს მინისტრის მოადგილე