თბილისში რუსული კანონის წინააღმდეგ აქციების მონაწილეების წინააღმდეგ შსს გაზს, წიწაკის სპრეის და წყლის ჭავლს იყენებს. იმასთან ერთად, რომ ვიცოდეთ, დარბევის დაწყების შემთხვევაში, როგორ დავიცვათ თავი, საჭიროა, ვიზრუნოთ უსახლკარო ძაღლებზე, რომლებიც ადამიანებთან ერთად იწამლებიან სპრეითა და გაზით. ამის შესახებ ინფორმაციას ვეტერინარული კლინიკა ვეტექსი ავრცელებს.

თუ ძაღლმა შეისუნთქა წიწაკის სპრეი, ან თვალებში მოხვდა, ის აუცილებლად დაიწყებს:

  • თათების ცხვირზე მოსმას
  • თათების თვალებზე მოსმას
  • მიწაზე თავით ხახუნს
  • ცემინებას
  • თავის ქნევას
  • უმისამართო მოძრაობას

მათ დასახმარებლად დაგჭირდებათ:

  • შპრიცი
  • ფიზიოლოგიური ხსნარი ან წყალი

აი, რას აკეთებთ:

  • პირველ რიგში, ძაღლს დასამშვიდებლად ეფერებით

  • შპრიცით (სასურველია დიდი ზომის, ნემსის თავის გარეშე) იღებთ წყალს ან ფიზიოლოგიურ ხსნარს, დაუფიქსირებთ ცხოველს თავს და სხეულს — უმჯობესია რამდენიმე ადამიანი აფიქსირებდეს ცალკე თავს და ცალკე სხეულს, რათა არ გაგექცეთ შიშისგან
  • მშვიდი, მაგრამ სწრაფი ნაკადით ამოურეცხავთ თვალებს
  • ცხვირის გამოსარეცხად გამოიყენებთ იგივე შპრიცს ნემსის თავის გარეშე და ნესტოებში ნელი ჭავლით შეასხამთ სითხეს. ცხოველს თავი სწორად უნდა ჰქონდეს გაჩერებული ან ოდნავ ქვემოთ უნდა ჰქონდეს დახრილი.

გახსოვდეთ, რომ აქციებზე ერთმანეთის დახმარებასთან ერთად, შეძლებისდაგვარად, მიუსაფარ ცხოველებზეც უნდა ვიზრუნოთ.