რა ხდება: საქართველოს პრემიერ-მინისტრმა, ირაკლი კობახიძემ სპეციალური ბრიფინგი გამართა რუსული კანონპროექტის მხარდასაჭერად და ამასთან, დამოუკიდებელი მედიის, არასამთავრობო ორგანიზაციებისა და ოპოზიციური პარტიების დისკრედიტაციის მიზნით.

• პრემიერ-მინისტრმა კიდევ ერთხელ გაიმეორა გზავნილი, რომ თითქოს, "ენჯეოებისა" და შესაბამისი მედიასაშუალებების გაუმჭვირვალობა გამოიყენება მათ მიერ იმგვარი საქმიანობის განსახორციელებლად, რომლებიც ქართული სახელმწიფოს და საზოგადოების ინტერესებს პრინციპულად ეწინააღმდეგება."
• ამასთან, კობახიძემ კიდევ ერთხელ შესთავაზა საჯარო დებატები იმ დასავლელ დიპლომატებს, რომლებიც მოუწოდებენ საქართველოს, არ მიიღოს რუსული კანონი, რადგან ის საფრთხეს შეუქმნის ქვეყნის ევროინტეგრაციის საკითხს.
• ამ ბრიფინგამდე მას ჰქონდა შეხვედრა გაფართოების შესახებ მოლაპარაკებების საკითხებში ევროკომისიის გენერალური დირექტორთან, რომლის საქართველოში ვიზიტის მიზანია, ისაუბროს ევროკავშირსა და საქართველოს შორის თანამშრომლობაზე, მათ შორის, კანდიდატის სტატუსთან დაკავშირებული 9 ნაბიჯის შესარულებისთვის საჭირო სამუშაოზე. [მეტი]

რა თქვა კობახიძემ ბრიფინგზე: განაცხადა, რომ "რადიკალურმა პარტიებმა", "ენჯეოებმა" და მედიასაშუალებებმა "3 წელი არ დაასვენეს ეს ქვეყანა" და განავითარა შეთქმულების თეორია, რომ თითქოს, რომ არა ქვეყანაში "რევოლუციური მცდელობები", საქართველოს ეკონომიკა დამატებითი 5 მილიარდი დოლარით გაიზრდებოდა.

• არასამთავრობო ორგანიზაციებისა და დამოუკიდებელი მედიასაშუალებების დემონიზებისა და მარგინალიზების მიზნით თქვა, რომ მათი საქმიანობა "ქართული სახელმწიფოს და საზოგადოების ინტერესებს პრინციპულად ეწინააღმდეგება."
• კობახიძემ ხალხის პროტესტს რუსული კანონის წინააღმდეგ, "რადიკალური ოპოზიციის რამდენიმე ძალადობრივი აქცია" უწოდა: "სჯობს, ეს ვიხილოთ ახლა, ვიდრე საქართველო რადიკალიზმისა და ე.წ. პოლარიზაციის ჩაკეტილ წრეში დავტოვოთ. ამის არდაშვება არის ჩვენი, როგორც ხელისუფლების, პასუხისმგებლობა ამომრჩევლის წინაშე, რომელმაც ქვეყნის მართვის მანდატი მოგვანიჭა. გარდა ამისა, როგორც უკვე აღინიშნა, ამ დღეებში რადიკალური პოლიტიკური უმცირესობა ანიავებს იმ ძალადობრივ რესურსს, რომელიც ოქტომბრის ბოლოსთვის უნდა შემოენახა, რაც საარჩევნოდ მომზადებული რევოლუციური სცენარის პრევენციას ეფექტურად უზრუნველყოფს", — თქვა მან.
• ასევე, კობახიძემ სამართალდამცავებს მოუწოდა, გამოავლინონ მაქსიმალური მოთმინება, რადგან "მარტივი არ არის ძალადობისა და შეურაცხყოფის რეაგირების გარეშე დატოვება".

ამასთან, განაცხადა, რომ "ყველა ცილისმწამებლური განცხადების ავტორი იზიარებს პასუხისმგებლობას იმ ძალადობაზე, რომელიც გუშინ რადიკალური პოლიტიკური უმცირესობის შესრულებით ვიხილეთ, ყველას ვაფრთხილებთ, საკუთარი მორალური და სამართლებრივი პასუხისმგებლობა სათანადოდ გაიაზრონ."

და ისაუბრა ლევან ხაბეიშვილზეც — ერთიანი ნაციონალური მოძრაობის თავმჯდომარეზე, რომელიც გასულ ღამეს პოლიციამ დააკავა. ხაბეიშვილი აცხადებს, რომ მას "ხარებას დაჯგუფებამ" სცემა. ამ მეტსახელით მოიხსენიებენ ზვიად ხარაზიშვილს, რომელიც შსს-ს განსაკუთრებულ დავალებათა დეპარტამენტის დირექტორია. [მეტი]

• "რა თქმა უნდა, არ იყო სასიამოვნო ლევან ხაბეიშვილის დაზიანებების ხილვა. ასევე, შეკრების დაშლის დროს დაფიქსირდა რამდენიმე სამწუხარო ინციდენტი. სამწუხაროა, რომ ძალადობა შობს ძალადობას. თითოეული ადამიანის ფიზიკურ დაზიანებაზე პასუხისმგებლობა ეკისრება ყველა იმ სუბიექტს და ადამიანს, რომელიც მთელი ამ დროის განმავლობაში ახალისებდა და იწონებდა ძალადობას, აქეზებდა ძალადობას პოლიციელების წინააღმდეგ, იწონებდა ელისაშვილის მიპარვით ძალადობას, ძალადობდა სიტყვიერად ხელისუფლების წარმომადგენლებზე, როდესაც მათ სხვადასხვა უკიდურესად შეურაცხმყოფელი ფორმით მოიხსენიებდნენ", — განაცხადა საქართველოში რუსული კანონის მიღების მხარდამჭერმა პრემიერ-მინისტრმა.

რა უნდა ვიცოდეთ 30 აპრილის პროტესტის დარბევის შესახებ — საიას შეფასება