აუდიტის სამსახურის დასკვნის მიხედვით, 2020 წლის 6 თვის განმავლობაში პოლიტიკურმა პარტიებმა შემოწირულებების სახით 7 მილიონ ლარზე მეტი მიიღეს, მათ შორის მმართველმა პარტიამ მთლიანი შემოწირულობის 67 პროცენტი, რაც 4 720 251 ლარია.

რაც შეეხება საერთო შემოსავლებს, დოკუმენტის თანახმად, 2020 წლის 6 თვის განმავლობაში პოლიტიკურმა პარტიებმა შემოსავლის სახით სულ 12 878 002 ლარი მიიღეს. აქედან შემოწირულობები 7 004 696 ლარი იყო, დანარჩენი კი კვალიფიციურ პოლიტიკურ სუბიექტებზე გაცემული საბიუჯეტო დაფინანსებაა.

პოლიტიკური პარტიებზე შემოწირულებები შემდეგნაირად გადანაწილდა:

  • ქართული ოცნება — 67 პროცენტი;
  • ლელო — 21 პროცენტი;
  • ნაციონალური მოძრაობა — 7 პროცენტი;
  • ევროპული საქართველო — 2 პროცენტი;
  • პატრიოტთა ალიანსი — 2 პროცენტი;
  • სხვა პარტიები — 0,2 პროცენტი.

ფოტო: საქართველოს აუდიტის სამსახური

რაც შეეხება პოლიტიკური პარტიების ხარჯებს, დასკვნის მიხედვით, მიმდინარე წლის 6 თვეში მათი ხარჯები 12 მილიონ ლარს აჭარბებს, მათ შორის რეკლამის ხარჯი 1 მილიონ ლარამდეა.

აუდიტის სამსახურის ცნობით, ქვეყანაში სულ 263 პოლიტიკური გაერთიანებაა რეგისტრირებული და მათ შორის აქტიურია 80. 2020 წელს 13 ახალი პოლიტიკური გაერთიანება დარეგისტრირდა. 2020 წლის არჩევნებისთვის საარჩევნო სუბიექტად რეგისტრაციაზე მიღებული განაცხადების რაოდენობა კი 68-ს შეადგენს.