უახლოეს ხანებში ჩვენ გვეყოლება ამერიკის შეერთებულ შტატებში ელჩი, რაც ორმხრივ ურთიერთობას კიდევ უფრო გააძლიერებს, — ამის შესახებ ტვ იმედის ეთერში ოცნების ხელისუფლების ეკონომიკისა და მდგრადი განვითარების მინისტრმა ლევან დავითაშვილმა განაცხადა.

"ელჩის დანიშვნასთან დაკავშირებით ჩვენ საუბარი არ გვქონდა, რადგან ჩვენ უკვე გვქონდა ინფორმაცია წარდგენილ კანდიდატებთან დაკავშირებით, რომ არსებობს დადებითი პოზიციები. უბრალოდ მიმდინარეობს სტანდარტული პროცედურები და აქედან გამომდინარე ეს არ არის საკითხი, რომელიც საჭიროებს ჩვენს ჩართულობას. ეს საკითხი პროცედურების შესაბამისად გადაწყდება და უახლოეს ხანებში ჩვენ გვეყოლება ამერიკის შეერთებულ შტატებში ელჩი, რაც რა თქმა უნდა, ორმხრივ ურთიერთობის კიდევ უფრო გააძლიერებს", — აღნიშნა დავითაშვილმა.

მისი თქმით, საქართველომ აშშ-სთან "სტრატეგიული ურთიერთობები ახალი ფურცლიდან უნდა დაიწყოს".

"სტრატეგიული ურთიერთობები ჩვენ ახალი ფურცლიდან უნდა დავიწყოთ. ვფიქრობ, რომ ორივე ხელისუფლებისთვის სტრატეგიული თანამშრომლობის აღდგენა არის ერთ-ერთი მთავარი ამოცანა, იმისთვის, რომ უფრო ხელშესახები იყოს თანამშრომლობა. მაგრამ ჩვენ წარმოგვიდგენია, რომ ძალიან ბევრი კონკრეტული ახალი მიმართულება შეიძლება შევიტანოთ, რაც რა თქმა უნდა ხელსაყრელი უნდა იყოს ორივე ქვეყნისთვის", — განაცხადა დავითაშვილმა.

შეგახსენებთ, რომ აშშ-ში საქართველოს ბოლო ელჩი დავით ზალკალიანი 2024 წლის 30 ნოემბერს გადადგა. თითქმის 5 თვეა საქართველოს ამერიკის შეერთებულ შტატებში ელჩი არ ჰყავს. ამას გარდა, გასული წლის 30 ნოემბერს ცნობილი გახდა, რომ აშშ საქართველოსთან მრავალწლიან პარტნიორულ ურთიერთობას აჩერებდა.

ლევან დავითაშვილი აშშ-შ იმყოფებოდა, სადაც შეხვედრები გამართა აშშ-ის კომერციის დეპარტამენტსა და სახაზინო დეპარტამენტში. ოცნების ხელისუფლების ეკონომიკისა და მდგრადი სამინისტროს პრესსამსახურის ცნობით, ლევან დავითაშვილი შეხვდა აშშ-ის სახელმწიფო მდივნის თანაშემწის მოადგილეს, ჯოშუა ჰაკს.