2019 წელს პარლამენტის 21 დეპუტატს სიტყვით გამოსვლის უფლებით არ უსარგებლია. ამის შესახებ საერთაშორისო გამჭვირვალობა — საქართველოს პარლამენტის საქმიანობის შეფასების ანგარიშშია საუბარი.

პარლამენტის მონიტორინგის ფარგლებში ორგანიზაციამ 2019 წლის 1 იანვრიდან 2019 წლის 31 დეკემბრამდე პერიოდში საკანონმდებლო ორგანოს საქმიანობა შეაფასა.

21 დეპუტატი, რომლებიც სიტყვით არ გამოსულან:

  • ირაკლი აბუსერიძე (უმრავლესობა, მაჟორიტარი);
  • ლევან ბეჟანიძე (უმრავლესობა, მაჟორიტარი);
  • რუსლან გაჯიევი (უმრავლესობა, მაჟორიტარი);
  • მახირ დარზიევი (უმრავლესობა);
  • მუხრან ვახტანგაძე (უმრავლესობა, მაჟორიტარი);
  • ზაზა კედელაშვილი (ევროპული საქართველო);
  • თეიმურაზ კოხრეიძე (უმრავლესობა);
  • იოსებ მაკრახიძე (უმრავლესობა, მაჟორიტარი);
  • სამველ მანუკიანი (უმრავლესობა);
  • ენზელ მკოიანი (უმრავლესობა, მაჟორიტარი);
  • გიორგი მოსიძე (დამოუკიდებელი წევრი, მაჟორიტარი);
  • რომან მუჩიაშვილი (უმრავლესობა, მაჟორიტარი);
  • რამაზ ნიკოლაიშვილი (დამოუკიდებელი წევრი);
  • რუსლან პოღოსიანი (უმრავლესობა);
  • დიმიტრი სამხარაძე (უმრავლესობა);
  • ერეკლე ტრიპოლსკი (უმრავლესობა);
  • გოდერძი ჩანქსელიანი (უმრავლესობა, მაჟორიტარი);
  • არჩილ ხაბაძე (უმრავლესობა);
  • ირაკლი ხახუბია (უმრავლესობა, მაჟორიტარი);
  • ელგუჯა გოცირიძე (უმრავლესობა, მაჟორიტარი);
  • ვიქტორ ჯაფარიძე (უმრავლესობა).

ჩამოთვლილი დეპუტატებიდან ზოგიერთს ხმა წლების განმავლობაში საერთოდ არ ამოუღია. 2019 წლის ნოემბრის მონაცემებით, მოქმედი პარლამენტის 16 დეპუტატს სამი წლის განმავლობაში ხმა საერთო არ ამოუღია. მათგან რვა "პრინციპული დეპუტატია" და პროპორციული საარჩევნო სისტემის კანონპროექტი ჩააგდო.

TI-ს ანგარიშში, ასევე, საუბარია, რომ 2019 წელს დეპუტატების მიერ საპატიო მიზეზით პლენარული სხდომების გაცდენის 1 200 შემთხვევა დაფიქსირდა, რაც შემცირებული მაჩვენებელია.

არასაპატიო მიზეზით პლენარული სხდომა ყველაზე მეტჯერ გააცდინეს:

  • დიმიტრი სამხარაძე (უმრავლესობა);
  • რუსლან გაჯიევი (უმრავლესობა);
  • ივლიანე წულაია (უმრავლესობა).

როგორც ანგარიშში ვკითხულობთ, ახალი რეგლამენტის ამოქმედების შემდეგ, სხდომების გაცდენებზე შესაბამისი პასუხისმგებლობის მექანიზმები იქნა გამოყენებული. კერძოდ, პლენარული სხდომების არასაპატიო მიზეზით გაცდენის გამო, პარლამენტის 25 დეპუტატს ხელფასის 10 პროცენტი დაუკავდა, 43 შემთხვევაში; კომიტეტის სხდომების არასაპატიო მიზეზით გაცდენის გამო, ხელფასის 10 პროცენტი დაუკავდა 22 დეპუტატს, 33 შემთხვევაში.