თბილისის სახელმწიფო უნივერსიტეტი განმარტავს, რატომ დაუდგინა იაგო კაჭკაჭიშვილს 20 წლის წინანდელ ნაშრომზე კეთილსინდისიერების დარღვევა. ერთობლივი განცხადება კომისიის ერთ-ერთმა წევრმა ზვიად აბაშიძემ ფეისბუქზე გაავრცელა.

განცხადებაში აღნიშნულია, რომ დასკვნა ვინმეს წინააღმდეგ მიმართული არაა. ისინი ხაზს უსვამენ, რომ კომისიის წევრობა კომისიაში მონაწილეები თავისი ნებით არ ერთიანდებიან, არამედ მათ არსებული სიიდან ირჩევს უნივერსიტეტი და კორპორაციული ეთიკის მიხედვით, უნივერსიტეტის აფილირებულ პროფესორ უფლება არ აქვს, წევრობაზე უარი თქვას.

კომისიის წევრები განმარტავენ, რომ მათ მოეთხოვებოდათ პასუხი გაეცა მხოლოდ ორ კითხვაზე: იყო თუ არა ე. წ. თვითპლაგიატის ფაქტი და იყო თუ არა დისერტაცია/სახელმძღვანელო კომპილაცია. მათივე თქმით, კომისიამ დაადასტურა თვითპლაგიატის ფაქტი და მიუთითა, რომ წიგნში ავტორის საკუთარი ნაშრომის მითითება "მეტი აკადემიური კეთილსინდისიერება იქნებოდა".

"კომისიამ უბრალოდ დაადასტურა ის, რაც ისედაც ცხადი იყო განსაკუთრებული განხილვის გარეშე. ამავე დროს, აღნიშნა კიდეც, რომ წიგნში ამ ყველაფრის მითითება მეტი აკადემიური კეთილსინდისიერება იქნებოდა. სწორედ ამას ნიშნავს დასკვნის ბოლო ნაწილში "აკადემიური კეთილსინდისიერების დარღვევა", რომელიც შესაძლო ბევრისთვის "სადამსჯელოდ" მოსჩანდეს, თუმცა რეალურად ეს ასე არ არის.

ამასთანავე, მოგეხსენებათ, რომ ამ ტიპის ე. წ. თვითპლაგიატის თაობაზე არ არსებობს არავითარი რეგულაცია და წესი. შესაბამისად, შეუძლებელია მისი ბოროტი განზრახვით გამოყენება.

ბ-ნი იაგო კაჭკაჭიშვილის ნაშრომის დაკნინება აზრად არავის მოგვსვლია! დასკვნაში არსად წერია, რომ ნაშრომი არ ემსახურება სოციოლოგიური აზრის განთვითარებას", — ვკითხულობთ განცხადებაში.

რაც შეეხება კომპილაციას, კომისიის წევრები აცხადებენ, რომ მათ არა კომპილაცია, არამედ კომპილაციის ნიშნები დაადგინეს:

"დასკვნაში არსად წერია, რომ ნაშრომი კომპილაციაა, დასკვნაში წერია, ის შეიცავს კომპილაციის ნიშნებს (და ხაზი გასმულია სახელმძღვანელოდ გადაკეთებაზე), როგორც დედამიწაზე არსებული ყველა თეორიული დისერტაცია და მით უმეტეს სახელმძღვანელო".

მათივე თქმით, დასკვნის "მთავარი პათოსი" კი ის იყო, რომ კომისიამ მიმართა აკადემიურ საბჭოს, არ დაეშვათ 20 წლის წინანდელ ნაშრომზე მსჯელობის პრეცედენტი.

რამდენიმე დღის წინ თსუ-ს პროფესორმა, იაგო კაჭკაჭიშვილმა განაცხადა, რომ მას შემდეგ, რაც, თსუ-ს რექტორი, გიორგი შარვაშიძე პლაგიატში ამხილა, მასზე შურისძიების რამდენიმე სერია მოაწყვეს. მისი განმარტებით, უნივერსიტეტში შექმნილმა ეთიკის კომისიამ, თავისივე დისერტაციის გამო, მეცნიერულ არაკეთილსინდისიერებაში დაადანაშაულა.