მეცნიერებმა პირველად აღმოაჩინეს დინოზავრის კუდი, რომელსაც შემორჩენილი აქვს ძვლები, რბილი ქსოვილის ფრაგმენტები და ბუმბულიც კი. ნაშთი, რომელიც 99 მილიონი წლით თარიღდება, ქარვაში გაქვავებული იპოვეს. ამის შესახებ საუბარია სამეცნიერო ჟურნალში, Current Biology-ში გამოქვეყნებულ სტატიაში.

ჩინელმა პალეონთოლოგმა, ქსინგ ლიდამ, ქარვა, რომელშიც უნიკალური მასალაა გაქვავებული, ბირმელი ვაჭრისგან შეიძინა. როგორც მეცნიერმა CNN-ს განუცხადა, ის თავიდანვე მიხვდა, რომ ქარვაში გაქვავებული ეგზემპლარი ხერხემლიანი ცხოველის დეტალი იყო და არა რომელიმე მცენარის, როგორც ეს ქარვის გამყიდველს ეგონა.

აი ასე გამოიყურებოდა დინოზავრი, რომლის კუდი ქარვაში აღმოაჩინეს.

ფოტო: Royal Saskatchewan museum/R.C. Mckellar

როგორც კანადელი მეცნიერი, რაიან მაკკელარი ამბობს, ქარვაში აქამდეც უპოვიათ დინოზავრების ეპოქის ფრინველების ბუმბულის ნაშთები, თუმცა, ეს არის პირველი შემთხვევა, როცა ამ ფორმით იპოვეს დინოზავრის თითქმის პირველადი ფორმით შემორჩენილი სხეულის ფრაგმენტი.

ფოტო: Royal Saskatchewan museum/R.C. Mckellar

თუმცა, აღმოჩენილი კუდი არ ეკუთვნის ისეთი გიგანტური ზომის, საშიშ დინოზავრებს, როგორიცაა მაგალითად, ტირანოზავრი, ან სხვა. ქარვა, რომელშიც დინოზავრის კუდია გაქვავებული, გამხმარი გარგარის ზომისაა, თავად დინოზავრი კი შეიძლებოდა ყოფილიყო ბეღურას ზომის, რომელიც ხელისგულზე დაეტეოდა. მას დაახლოებით თაგვის მსგავსი კუდი ჰქონდა, ოღონდ თხელი ბუმბულით დაფარული.

მიუხედავად იმისა, რომ ქარვაში გაქვავებულ დინოზავრის კუდში იპოვეს რბილი ქსოვილისა და სისხლის ნარჩენებიც კი, ის გენეტიკურ ინფორმაციას არ შეიცავს.