ადამიანის უფლებების დაცვისა და სამოქალაქო ინტეგრაციის საპარლამენტო კომიტეტის თავმჯდომარე, სოფო კილაძე მიიჩნევს, რომ ზოგიერთ შემთხვევაში შესაძლებელია ინტერნეტის თავისუფლების შეზღუდვა, მაგალითად, როცა საქმე ტერორიზმს ეხება:

"როდესაც ტერორიზმის გავრცელების საფრთხე არის, ტერორისტული ვიდეოს გავრცელების საფრთხე არის, ეს საფრთხე რეალურია და დროში მეყსეულია, თავისთავად უპირატესობა უნდა მიენიჭოს იმას, რომ ტერორიზმი არ გავრცელდეს და რაღაც კონკრეტული არ დაშავდეს. ტერორიზმის თემა, ისეთ რეგიონში, როგორშიც ჩვენ ვართ, ძალიან დიდი გამოწვევაა. ეს შესაძლოა იყოს კონკრეტული უფლების, მათ შორის ინტერნეტის თავისუფლების შეზღუდვის საფუძველი."

კილაძის თქმით, რთულია ე.წ. ოქროს შუალედის პოვნა, ინტერნეტის თავისუფლებასა და უსაფრთხოების საკითხებს შორის:

"ერთი, ეს არის ინტერნეტის თავისუფლება და ინფორმაციასთან წვდომის თავისუფლება და მეორე, ეს არის უსაფრთხოების საკითხები. აქაც ოქროს შუალედის მოძებნა ძალიან რთულია...ნებისმიერ შემთხვევაში სამართლებრივი სახელმწიფოს თანაზომიერების პრინციპიდან გამომდინარე, იმ წუთში რომელი უფლება უფრო მნიშვნელოვანი არის, ამას ენიჭება მნიშვნელობა. მე, როგორც იურისტი, სწორედ იმას მივანიჭებდი უპირატესობას, რომელიც უფრო მეტად მნიშვნელოვანია."

Freedom House-მა საქართველოს 1 ქულა დააკლო ინტერნეტის თავისუფლების ინდექსში იმის გამო, რომ სახელმწიფო უწყებების ჩარევის შედეგად, რამდენიმე საათით გათიშეს იუთუბი და ვორდპრესი. მოტივად დასახელდა, რომ უნდოდათ წვდომა შეეზღუდათ ტერორისტული შინაარსის კონკრეტულ ვიდეოზე.

ინტერნეტის თავისუფლებასა და სხვა საკითხებზე სოფო კილაძის მოსაზრებები სრულად წაიკითხეთ On.ge-ს ინტერვიუში.