ფინანსთა მინისტრის მოადგილის, გიორგი კაკაურიძის განცხადებით, აპრილში ხელფასი 170 ათას ადამიანს არ მიუღია, თუმცა კომპანიებმა 1 200-ლარიანი კომპენსაციისთვის მხოლოდ 95 ათას ადამიანზე წარადგინეს ინფორმაცია. ამის შესახებ გიორგი კაკაურიძემ თავდაცვისა და უშიშროების კომიტეტის სხდომაზე განაცხადა, სადაც 2020 წლის ანტიკრიზისულ ბიუჯეტს განიხილავდნენ.

"ბევრი კითხვა გაუჩნდათ კომპანიებს, რომ მე არ გამიშვია და მომავალში ავუნაზღაურებ. ხელფასი ვერ მისცეს, მაგრამ სამსახურიდანაც არ გაუშვეს და რადგანაც სამსახურიდან არ გაუშვეს, ჩათვალეს, რომ არ უნდა შემოეტანათ განცხადება. ამ საკითხზე rs.ge-ს მეშვეობით დამატებითი ინფორმაცია მივაწოდეთ და ვფიქრობთ, მაისის ხელფასებში ნათლად გამოჩნდება და მონაცემი, რაც გვაქვს, გაორმაგდება", — განაცხადა კაკაურიძემ.

მისივე თქმით, ივნისში ელოდებიან, რომ კომპენსაციის მიმღებთა რიცხვი გაორმაგდება.

კაკაურიძის განცხადებითვე, მაისში კომპენსაცია სულ 400 ათასმა ადამიანმა მიიღო. რაც შეეხება თვითდასაქმებულებს, განაცხადი უკვე 90 ათასმა პირმა შემიტანა და მათგან 60 ათასზე გადაწყვეტილება უკვე მიღებულია:

"3-4 ათასი განაცხადი შემოდის ყოველდღიურად და პროცესი მიმდინარეობს. თითქმის ერთი თვეა დარჩენილი და ვფიქრობთ, ეს მოცულობა, რაც არის დაგეგმილი, 75 მილიონი, საკმარისი იქნება ამ მიმართულებით. ინფორმაციის მიწოდებაც ალბათ დამატებით იქნება საჭირო".

მინისტრის მოადგილე განმარტავს, რომ შემოსავლების სამსახურის მიერ 150 ათასი თვითდასაქმებული იდენტიფიცირებული, ვისაც კომპენსაცია ეკუთვნის.