ემა ჰემინგ უილისმა, რომელიც 70 წლის მსახიობზე 2009 წლიდან არის დაქორწინებული, ცოტა ხნის წინ პოდკასტში Conversations With Cam სტუმრობისას მეუღლის ჯანმრთელობის მდგომარეობაზე ისაუბრა, სადაც ბოლო სიახლეებიც გააზიარა.

"ვფიქრობ, მათთვის ეს ნორმალური მდგომარეობაა", — თქვა მან — "არსებობს ერთი ტერმინი, ნევროლოგიური მდგომარეობა, რომელიც თან ახლავს როგორც FTD-ს, ისე დემენციის სხვა ფორმებსაც, ამას ანოზოგნოზია ეწოდება. ამ დროს ტვინი ვერ აცნობიერებს, რა ხდება მის თავს. ზოგჯერ ადამიანებს ჰგონიათ, რომ ეს უარყოფაა, თითქოს ადამიანს არ უნდა ექიმთან წასვლა და ამბობს: 'კარგად ვარ'. სინამდვილეში, აქ სწორედ ანოზოგნოზია მოქმედებს. ეს ურყოფა არ არის. უბრალოდ ტვინი იცვლება. ეს დაავადების ნაწილია".

ჰემინგ უილისმა განაგრძო: "ამ დაავდების ჯილდოც და წყევლაც სწორედ ეს არის, ბრიუსი ამ პროცესში საერთოდ არ ჩართულა. მას არასდროს გაუაზრებია, რომ ეს დაავადება აქვს. და მე ამით ძალიან ბედნიერი ვარ. ძალიან მიხარია, რომ მან ამის შესახებ არ იცის".

მან ასევე განმარტა, რომ Die Hard-ის ვარსკვლავი ოჯახის წევრებს კვლავ ცნობს. წყვილს ორი ქალიშვილი ჰყავს, 11 და 13 წლის.

ბრიუს უილისი მეუღლესთან ერთად

ფოტო: Michael Buckner/Variety/Penske Media

"ის ჯერ კიდევ ძალიან 'აქ არის', საკუთარ სხეულში", — თქვა მან — "როცა ვინმე მეკითხება: 'ბრიუსს ჯერ კიდევ ახსოვს, ვინ ხარ?' — დიახ, ახსოვს, რადგან მას ალცჰაიმერი არ აქვს; მას FTD აქვს. მას აქვს ჩვენთან, ჩემთან და ჩვენს შვილებთან, კავშირის საკუთარი გზა. ეს შეიძლება არ ჰგავდეს იმ ურთიერთობას, როგორიც შენ გექნებოდა შენს საყვარელ ადამიანთან, მაგრამ ის მაინც ძალიან ლამაზია და სიღრმით სავსე. უბრალოდ სხვანაირია. და შენც სწავლობ, როგორ მოერგო".

ბრიუს უილისს ფრონტოტემპორალური დემენციის (FTD) დიაგნოზი 2023 წელს დაუსვეს, ეს დაავადება მის კომუნიკაციის უნარებს ზღუდავს.

გასული წლის აგვისტოში ჰემინგ უილისმა თქვა, რომ The Sixth Sense-ის მსახიობი კვლავ "ძალიან მოძრავია".

"ბრიუსი ზოგადად ძალიან კარგ ფიზიკურ მდგომარეობაშია", — თქვა მან ABC-ის სპეციალურ გადაცემაში — "უბრალოდ ტვინი ღალატობს.. ენა ნელ-ნელა ქრება და ჩვენ ვისწავლეთ ადაპტირება. გვაქვს მასთან ურთიერთობის საკუთარი გზა, ეს უბრალოდ განსხვავებული გზაა".

დემი მურმა, რომელიც უილისზე 13 წლის განმავლობაში,1987-დან 2000 წლამდე, იყო დაქორწინებული, და მათმა სამმა ქალიშვილმა, რუმერმა, სკაუტმა და თალულამ, საჯაროდ შეაქეს უილისის ამჟამინდელი მეუღლე ბრიუსის მხარდაჭერისა და გვერდში დგომისთვის.

"ამ ყველაფერში ემის მიმართ უზარმაზარი თანაგრძნობა მაქვს, როგორც ახალგაზრდა ქალის მიმართ", — თქვა მურმა გასული წლის სექტემბერში წინასწარ ჩაწერილ ინტერვიუში, რომელიც ოპრას პოდკასტის ერთ-ერთ ეპიზოდში გავიდა — "არავის შეეძლო წინასწარ წარმოედგინა, სადამდე მივიდოდა ეს ყველაფერი. და მე ნამდვილად ვფიქრობ, რომ მან საოცარი საქმე გააკეთა. მან მთლიანად მიუძღვნა თავი სწორი გზის გაკვალვას. ამ პროცესში მას ერთდროულად ჰქონდა შიში, ძალა და გამბედაობა."

ასევე ნახეთ: "მისი ტვინი ნელ-ნელა ფუნქციონირებას წყვეტს", — ბრიუს უილისის ცოლი