გლობალურ სარეკლამო ინდუსტრიაში ალბათ არავის აქვს ისეთი დრამატული და ხანგრძლივი "ომი", როგორიც კოკა-კოლასა და პეპსის. თითქმის ნახევარი საუკუნეა, ეს ბრენდები თავიანთი მარკეტინგული კამპანიებით რეგულარულად იღებენ ერთიმეორეს სამიზნეში. ასე რომ, პეპსის ახალი რეკლამა, სადაც კოლას ორ სასმელს შორის არჩევანი პეპსიზე კეთდება, შოკისმომგვრელი არავისთვის ყოფილა. თუმცა, აქ ერთი საინტერესო დეტალია — პეპსის კოკა-კოლას სიმბოლოდ ქცეული თეთრი დათვი ირჩევს.

ოსკაროსანი ახალზელანდიელი რეჟისორის, ტაიკა ვაიტიტის, გადაღებული 45-წამიანი რეკლამა გვიჩვენებს, როგორ ეწყება ეგზისტენციალური კრიზისი პოლარულ დათვს, რომელიც "ბრმა გასინჯვის" შემდეგ არჩევანს პეპსიზე აკეთებს. საგონებელში ჩავარდნილი დათვი ჯერ ფსიქოლოგს მიაკითხავს (რომლის როლსაც ასევე ვაიტიტი ასრულებს), მერე Queen-ის უკვდავი ჰიტის ფონზე ქუჩებში დაბორიალობს, ბოლოს კი პეპსით ხელში კონცერტზე აღმოჩნდება. აქ პეპსიმ შარშანდელი წლის ცნობილი მიმი გააცოცხლა — Coldplay-ის კონცერტზე რომ კომპანიის დირექტორისა და მენეჯერის საიდუმლო რომანი გამოაშკარავდა. რეკლამა, სახელწოდებით არჩევანი, ამერიკის საფეხბურთო ლიგის მოახლოებულ ფინალს, "სუპერ-ბოულს", ეძღვნება, რომლის სპონსორიც სწორედ პეპსი გახლავთ.

პეპსის ცნობით, რეკლამა გასულ წელს 34 სხვადასხვა ბაზარზე ჩატარებული მოკვლევის მონაცემებს ეყრდნობა, რომლის მიხედვითაც, მონაწილეების 66%-მა უშაქრო კოკა-კოლას პეპსის უშაქრო ვერსია ამჯობინა. ამდენად, ბრენდის განცხადებით, რეკლამაში გამოყვანილი პოლარული დათვი, "უბრალოდ, კოლას რიგითი მოყვარულია, რომელიც ამერიკელების უმრავლესობას წარმოადგენს".

რეალურად კი, პოლარული დათვი უკვე სამ ათწლეულზე მეტია, კოკა-კოლას სიმბოლოა და ხშირად ჩნდება ბრენდის სარეკლამო აქტივობებში. თეთრი დათვები ვიხილეთ კოკა-კოლას შარშანდელ საშობაო რეკლამაშიც, რომელიც სრულად იყო ხელოვნური ინტელექტით გენერირებული. პეპსის რეკლამა კი ამ ფეხმოკიდებულ პრაქტიკასაც დაუპირისპირდა — კომპანიის მარკეტინგის ვიცე-პრეზიდენტი გუსტავო რეინა ამბობს, რომ დათვი კომპიუტერული გრაფიკით შეიქმნა, მაგრამ მათთვის მნიშვნელოვანი იყო, რეკლამა ადამიანური შემოქმედების პროდუქტი ყოფილიყო.

"თუკი რამეზე ვზრუნავთ და რამის გვჯერა, ესაა ჩვენი გუნდის შემოქმედებითობა და ოსტატობა, ჩვენი ნიჭიერება და ჩვენი პარტნიორები", — აღნიშნავს რეინა, — "სწორედ ამ ნიჭის და ოსტატობის წყალობით გავაცოცხლეთ დათვი რეკლამაში".

ასევე იხილეთ: