სად არის გამოწვევები, სად არის ხარვეზები მთლიან ამ ჯაჭვში, რომელიც საბოოლოო ჯამში დახლზე ფასად გადაიქცევა, ამას შევისწავლით, — განაცხადა ოცნების პარლამენტის თავმჯდომარემ, შალვა პაპუაშვილმა ფასების საპარლამენტო კომისიაზე საუბრისას. მისი თქმით, საგამოძიებო კომისიას შოთა ბერეკაშვილი უხელმძღვანელებს.

მისივე თქმით, "თავად მეწარმეების მხრიდან არის განწყობა, რომ რაღაც არ არის სწორად ჩვენს სისტემაში და იმ ფასებში, რასაც დახლებზე ვხედავთ".

"ჩვენი სურვილია, ვგულისხმობ ქართული ოცნების ფრაქციას, რომ ბატონმა შოთა ბერეკაშვილმა უხელმძღვანელოს საგამოძიებო კომისიას. გუშინ დავაანონსე კიდევაც, რომ კომიტეტის გადასაწყვეტია, თუმცა ინიციატორი ფრაქციის წინადადებაა, რომ 14 — კაციანი კომისია იყოს, სადაც 7 იქნება ქართული ოცნებიდან, 3 — ხალხის ძალიდან, 3 საქართველოსთვის ფრაქციიდან, 1 — ევროსოცები. ჩვენ სამშაბათს დადგენილებით შევქმნით კომისიას. შემდეგ არის პროცედურული საკითხები, პირველი სხდომა და ა.შ., რაც ვფიქრობ, რომ ოთხშაბათს მოესწრება, ასე რომ ხუთშაბათიდან უკვე შეუძლია კომისიას სრულფასოვნად მუშაობის დაწყება.

იქნება კომისია 3 თვის ვადით და მთავრობასაც ასეთი გრაფიკი აქვს დაანონსებული, რომ აპრილის ბოლომდე იმუშაოს, ჩვენც პარალელურ რეჟიმში ვიმუშავებთ. იცით, რომ ეს არის პრემიერის ინიციატივა და მათ შორის პრემიერის მოწოდება იყო, რომ პარლამენტსაც განეხილა საკითხი, რომ საპარლამენტო ფორმატიც შეგვექმნა ამ საკითხებისთვის, ამიტომ მთავრობასთან თანამშრომლობით ჩვენ ვიმუშავებთ ამ საკითხზე. ის მიგნებები, რაც სამთავრობო კომისიაში იქნება, ვთხოვთ, რომ გაგვიზიარონ. მათ შორის, სამთავრობო პროცესი არის უფრო სამუშაო, დახურული რეჟიმი, პარლამენტი კი იძლევა იმის საშუალებას, რომ ეს იყოს ღია, საჯარო პროცესი. რაც შეეხება შედეგებს, კარგი სიგნალი ის არის, რომ ვხედავთ, თავად მეწარმეების მხრიდან არის განწყობა, რომ მართლაც რაღაც არ არის სწორად ჩვენს სისტემაში და იმ ფასებში, რასაც ჩვენ დახლებზე ვხედავთ. სად არის გამოწვევები, სად არის ხარვეზები მთლიან ამ ჯაჭვში, რომელიც საბოოლოო ჯამში დახლზე ფასად გადაიქცევა, ამას შევისწავლით და საზოგადოებასთან ერთად ვნახავთ, სად რა არის შესაძლებელი. ჩვენ წინასწარ მზა რეცეპტები არ გვაქვს, ამიტომაც არის კომისია და მოკვლევა ხდება საკითხის. საზოგადოებასთან ერთად იქნება ეს ყევლაფერი", — განაცხადა პაპუაშვილმა.

შეგახსენებთ, რომ "ფასების საპარლამენტო კომისია" 2 თებერვლიდან დაიწყებს მუშობას.