Sony-ს ოთხფილმიანი პროექტი The Beatles ნელ-ნელა ფორმას იძენს, უნიკალური მარკეტინგული სტრატეგიის ფარგლებში სტუდიამ ოთხი განსხვავებული საფოსტო ბარათი დაბეჭდა (თითოეულზე წარმოდგენილია მთავარი მსახიობებიდან ერთ-ერთი, პერსონაჟის ვიზუალში). ბარათები Liverpool Institute of Performing Arts-ში დამალეს, რათა სტუდენტებს თავად ეპოვათ. ფილმები რომლის რეჟისორიც სემ მენდესია, კინოთეატრებში 2028 წლის აპრილში გამოვა. ფილმებში მონაწილეობენ: ჰარის დიკინსონი ჯონ ლენონის როლში, პოლ მესკალი პოლ მაკარტნის როლში, ჯოზეფ ქვინი ჯორჯ ჰარისონის როლში და ბარი კიეგანი, როგორც რინგო სტარი.

The Beatles-ის ბიოფილმების მსახიობების პირველი ვიზუალები

"ახალი ბითლზის ფილმების სარეკლამო ექსკლუზიური საფოსტო ბარათები მივიღეთ!" — დაწერა LIPA-ს ოფიციალურმა ინსტაგრამ ანგარიშმა ხუთშაბათს, რითიც სტუდიამ ლეგენდარული ჯგუფის მშობლიურ ქალაქს, ლივერპულს, პატივი მიაგო — "ბარათები LIPA-ს ტერიტორიაზე დავმალეთ და გვინდა, სტუდენტებმა თავად იპოვონ".

ოთხივე ფილმის წარმოება უკვე დაწყებულია და თითოეული მათგანი ბენდის თითო წევრზე იქნება ფოკუსირებული. მსახიობთა შემადგენლობას ასევე ავსებენ: სირშა რონანი, ჯეიმს ნორტონი, ანა სავაი, ეიმი ლუ ვუდი და სხვები.

ფილმების ოთხივე მთავარი როლი ოფიციალურად გასულ წელს, CinemaCon-ზე გამოცხადდა, სადაც მენდესი მსახიობებთან ერთად სცენაზე ავიდა. "ჩვენ The Beatles-ზე ერთ ფილმს არ ვიღებთ, ოთხს ვქმნით", — უთხრა რეჟისორმა დამსწრეებს — "შესაძლოა, ეს მათი უფრო სიღრმისეულად გაგების შანსია".

მსახიობების ანონსი ბითლზის როლებში CinemaCon-ზე

ფოტო: GQ

ფილმების სცენარებზე მუშაობდნენ ტონის ჯილდოს მფლობელი ჯეზ ბათერვორზი, (Ford v Ferrari), ოსკარის ლაურეატი პიტერ სტროგანი (Conclave) და BAFTA-სა და ტონის ჯილდოების მფლობელი ჯეკ თორნი (Adolescence).

ასევე ნახეთ: ცნობილი გახდა, ვინ ითამაშებს The Beatles-ის ფილმებში