საერთაშორისო გამჭვირვალობა — საქართველოს საზოგადოებრივი კვლევის თანახმად, გამოკითხულთა 63 პროცენტი ფიქრობს, რომ მოხელეების მიერ თანამდებობის ბოროტად გამოყენება გავრცელებული ან ძალიან გავრცელებულია.

ფოტო: TI

რაც შეეხება ძალაუფლების ბოროტად გამოყენების მიზნებს, ის რესპონდენტები, რომლებიც ფიქრობენ, რომ ასეთი ქმედება გავრცელებულია, მიიჩნევენ, რომ მისი მიზანია ოჯახის წევრების, ნათესავების და ახლობლების დასაქმება (92 პროცენტი), საკუთარი ან ახლობლების ბიზნესის მფარველობა (90 პროცენტი), ბიუჯეტის თანხების არამიზნობრივი ხარჯვა (81 პროცენტი), სხვადასხვა საქმის მოგვარების სანაცვლოდ ქრთამის აღება (60 პროცენტი).

ფოტო: TI

გამოკითხულთა უმრავლესობა, 57 პროცენტი ასევე ფიქრობს, რომ გავრცელებული ან ძალიან გავრცელებულია თანამდებობის პირებთან დაკავშირებული კომპანიებისთვის უპირატესობის მინიჭება სახელმწიფო შესყიდვების პროცესში.

საზოგადოებრივი აზრის კვლევა საერთაშორისო გამჭვირვალობა — საქართველოს დაკვეთით კავკასიის კვლევითი რესურსების ცენტრმა (CRRC) 2020 წლის 27 თებერვლიდან 18 მარტამდე პერიოდში ჩაატარა. კვლევის ფარგლებში მთელი ქვეყნის მასშტაბით 1 763 ადამიანი გამოიკითხა. კვლევის საშუალო ცდომილება 2,2 პროცენტია.