ანტისაოკუპაციო მოძრაობა ძალა ერთობაშიას დამაარსებელი დავით ქაცარავა სახელმწიფო უსაფრთხოების სამსახურში, რასობრივი დისკრიმინაციის საქმეზე, გამოკითხვაზე დაიბარეს. უწყების განცხადებით, ქაცარავა მოწმის სტატუსით დაიკითხა. ქაცარავა სუს-ში დაბარებას მის ანტიოკუპაციურ მოძრაობასა და დავით-გარეჯის საკითხე აქტიურობას უკავშირებს.

"გარეჯის თემა არის ახალი შეთხზული, ახალი მოგონილი და ამ თემას გამოიყენებენ, შეეცდებიან ყოველ შემთხვევაში, რომ როგორღაც შეაჩერონ ანტისაოკუპაციო მოძრაობა ძალა ერთობაშია, რომელიც უკვე სამი წელიწადია მოქმედებს საოკუპაციო ხაზებთან და აქტიურობს დავით-გარეჯის თემასთან დაკავშირებით.

გვიმალავენ გატაცებულების რაოდენობებს, გვიმალავენ რუსი ოკუპანტების აქტივობებს და ეს ყველაფერი არის შედეგი იმ პოლიტიკისა, რასაც აწარმოებს ჩვენი ხელისუფლება — რუსეთის არგაღიზიანების პოლიტიკა", — განაცხადა მან გამოკითხვაზე შესვლის წინ.

რასობრივი დისკრიმინაციის საქმეზე გამოძების დაწყების შესახებ უწყებამ ინფორმაცია 30 მაისს გაავრცელა. მათი განამრტებით, ეს საქმე მოიცავს ქმედებას, ჩადენილს ეროვნული მტრობის და განხეთქილების ჩამოგდების, ეროვნული პატივისა და ღირსების დამცირების მიზნით, აგრეთვე ეროვნული და ეთნიკური კუთვნილების ნიშნით ადამიანის უფლებების პირდაპირ ან არაპირდაპირ შეზღუდვას ან/და იმავე ნიშნით ადამიანისათვის უპირატესობის მინიჭებას, რამაც არსებითად ხელყო მისი უფლება, ჩადენილი პირთა ჯგუფის მიერ, დანაშაული გათვალისწინებული საქართველოს სსკ-ის 1421-ე მუხლის მე-3 ნაწილის "ა" ქვეპუნქტით.

"სახელმწიფო უსაფრთხოების დეპარტამენტში არსებული ოპერატიული ინფორმაციის თანახმად, საქართველოში არსებობენ პირთა ჯგუფები და რიგი მოქალაქეებისა, რომლებიც ცდილობენ ქვემო ქართლის და კახეთის რეგიონში ეთნიკურ ქართველებსა და აზერბაიჯანელებს შორის შუღლის გაღვივებას.

აღნიშნული პირები ნეგატიურ კონტექსტში აქტიურად იყენებენ წლების მანძილზე დაგროვებულ ისეთ საკითხებს, რომელთა არასწორი, თითქოსდა პატრიოტული მოტივებით გახმოვანების და რომელიმე ეთნიკური ჯგუფის მიმართ მიზანმიმართული საჯარო მოწოდებების გაკეთების შემთხვევაში, ქვეყნის იმ რეგიონებში, რომლებიც მჭიდროდ არის დასახლებული ეთნიკური აზერბაიჯანელებით, აშკარა საფრთხეს უქმნის ეთნიკურად ქართველ მოსახლეობასთან მათ მშვიდობიან თანაცხოვრებას", — აცხადებენ უწყებაში.

მათი განმარტებით, აღნიშნული პირები, იჭრებიან სახელმწიფოს და ხელისუფლების კომპეტენციას მიკუთვნებულ საკითხებში და ცდილობენ ქვემო ქართლის და კახეთის რეგიონში, წამოჭრილი საკითხების გამოყენებას "ეროვნული მტრობის ჩამოგდების მიზნით".