თურქეთის პრეზიდენტმა, რეჯეფ თაიფ ერდოღანმა სოციალურ ქსელ X-ზე გამოაქვეყნა ვიდეო, რომელიც თურქეთში მიმდინარე საპროტესტო აქციებს ასახავს. ვიდეოკადრებში შემთხვევით თბილისში, აქციის დაშლის კადრები მოხვდა ჭიჭინაძის ქუჩისა და პარლამენტის უკანა შესასვლელის ხედით.

ერდოღანის მიერ გავრცელებულ ვიდეოში საუბარია იმაზე, რომ ოპოზიციური პარტიის წარმომადგენლები ხალხს პოლიციის წინააღმდეგ განაწყობენ. კლიპში ასევე ჩასმულია თურქი ოპოზიციონერების მიმართვებიდან ნაწყვეტები.

თბილისის პროტესტის კადრებამდე ვიდეოში საუბარია, (კადრები შეგიძლიათ იხილოთ 4:16 წუთზე) რომ ოპოზიციის ლიდერებმა ვერ უპასუხეს კორუფციასა და ტერორიზმის ბრალდებებს და ამის სანაცვლოდ ქუჩაში გამოიყვანეს ნიღბებიანი დაჯგუფებები, რომლებიც პოლიციის წინააღმდეგ ძალადობენ.

შეგახსენებთ, 19 მარტს თურქეთის ხელისუფლებამ თურქეთის, პრეზიდენტ რეჯეფ თაიფ ერდოღანის მთავარი კონკურენტი, სტამბულის მერი ექრემ იმამოღლუ კორუფციისა და ტერორის გამოძიების ფარგლებში დააკავა და პატიმრობა შეუფარდა.

დაკავებიდან მალევე იმამოღლუ თანამდებობას ფორმალურად ჩამოაშორეს, ხოლო მის ნაცვლად მერის პოსტზე ნური ასლანი დაინიშნა, რომელიც ამჟამად სტამბოლის მოქმედი მერია.

ცნობისათვის, თურქეთში მთავარი ოპოზიციური ძალის, თურქეთის სახალხო რესპუბლიკური პარტიის პრაიმერიზში სტამბოლის მერმა, ექრემ იმამოღლუმ გაიმარჯვა. 23 მარტს ჩატარებულ შიდაპარტიულ არჩევნებში 15 მილიონმა ადამიანმა მიიღო მონაწილეობა და აქედან 13 211 000 მოქალაქემ 2028 წლის საპრეზიდენტო კანდიდატად იმამოღლუ აირჩია.

დაკავება საპრეზიდენტო კანდიდატების დასახელებამდე რამდენიმე დღით ადრე მოხდა. როგორც თურქული მედია წერს, მთავარ ოპოზიციურ რესპუბლიკურ სახალხო პარტიას (CHP) იმამოღლუ საპრეზიდენტო კანდიდატად უნდა დაესახელებინა. ერთი დღით ადრე, სტამბოლის უნივერსიტეტმა იმამოღლუს დიპლომი გაუუქმა, რითაც ფაქტობრივად პოპულარული ოპოზიციური ფიგურის საპრეზიდენტო არჩევნებიდან დისკვალიფიკაცია მოახდინა.

20 მარტს, თურქეთში, სტამბოლის მერის, ექრემ იმამოღლუს დაკავებასთან დაკავშირებით სოციალურ ქსელში "პროვოკაციული" პოსტების გამოქვეყნების ბრალდებით 37 ადამიანი დააკავეს. ინტერნეტ-დამკვირვებლის NetBlocks-ის ინფორმაციით, თურქეთში X-ზე, YouTube-ზე, Instagram-სა და TikTok-ზე წვდომა შეიზღუდა.

ანკარის გუბერნატორის ადმინისტრაციამ მასობრივი აქციების, შეკრებებისა და მიტინგების ჩატარება 26 მარტიდან 1-ელ აპრილამდე აკრძალა.

26 მარტის ინფორმაციით, თურქეთის საპროტესტო აქციებზე დაკავებულთა რიცხვი 1400-ს აჭარბებს. BBC ცნობით, ბევრი სტუდენტი იმის შიშით, რომ პოლიციას მათი იდენტიფიცირება არ მოხდეს სახე შარფებითა და ნიღბებით აქვთ დაფარული. ნისანტასის რაიონში სტუდენტების მსვლელობისას სკანდირებდნენ "მთავრობა, გადადექი!" და აფრიალებდნენ დროშებსა და ბანერებს.