ვანისა და ბაღდათის მიტროპოლიტი ანტონი ამბობს, მართლმადიდებელი ეკლესიისა და სასულიერო პირების ქონებაზე ხაზგასამით, მათ საწინააღმდეგოდ მიზანმიმართული კამპანია მიმდინარეობს.

მისი თქმით, პირადად მის სიმდიდრეზე ცრუ ინფორმაციას ავრცელებენ და ამით ხალხს "შეძლებულ კაცს" აზარებენ.

"აიღეთ, თუ გინდათ, ჩემზე, ხატების ქურდობისათვის მილიონერიაო, დამიდევით [მტკიცებულება]. რას ემსახურება? 4 200 კვადრატი მიწა მაქვს, 2 გადაწიეს წინ და 42 000-იო. რას ემსახურება ეს შეგნებულად? პირადული თავდაცვა კიარ მინდა, უცებ მაგალითს ვამბობ... მილიონერიო... რატომ? რაში ჭირდებათ? ჯერ ერთი, რატომ აზარებთ შეძლებულ კაცს? ნეტავი მქონდეს", — განაცხადა სასულიერო პირმა TV პირველის ეთერში.

ტოლერანტობისა და მრავალფეროვნების ინსტიტუტის განცხადებით, მართლმადიდებელი ეკლესიის საპატრიარქომ 2002 წლიდან 2019 წლის ჩათვლით სახელმწიფო ბიუჯეტიდან დაახლოებით 276,5 მილიონი ლარი მიიღო. გარდა ამისა, TDI-ის ინფორმაციით, თვითმმართველი თემები და ქალაქები საპატრიარქოს გადასცემენ "მატერიალურ სიკეთეს", ყოველწლიურად, დაახლოებით 4-5 მილიონ ლარს. მათივე ინფორმაცით, 2018 წელს საქართველოს საპატრიარქოს ბიუჯეტიდან გამოეყო 25 535 400 ლარი, ხოლო 2019 და 2020 წლისთვის ბიუჯეტში კვლავ 25 მილიონი ლარია გათვალისწინებული.

მათივე თქმით, საპატრიარქო სახელმწიფოსგან იღებს ასევე დიდი მასშტაბის უძრავ ქონებას: მიწის ნაკვეთებსა და შენობა-ნაგებობებს. TDI აცხადებს, რომ მათი და სხვა ორგანიზაციების მონაცემებზე დაყრდნობით, დღემდე სახელმწიფოს მიერ საპატრიარქოსთვის გადაცემული ქონება 64 კვ. კმ–მდე ფართობს მოიცავს.

TDI-ის განმარტებით, სახელმწიფო პოლიტიკის ანალიზი აჩვენებს, რომ საქართველოს კონსტიტუციით დაცული რელიგიისა და სახელმწიფოს ურთიერთგამიჯვნის პრინციპი ხშირად ირღვევა საქართველოს საპატრიარქოსთვის ფინანსური, სამართლებრივი და სოციალური პრივილეგიების მინიჭებისა და სხვა რელიგიური გაერთიანებების მიმართ დიფერენცირებული მოპყრობის გამო.