ფინანსთა მინისტრის, ივანე მაჭავარიანის განმარტებით, კომპენსაციას მიიღებენ ისინიც, ვისაც დამსაქმებელმა ხელფასი შეუწყვიტა, მაგრამ უხდიდა დაზღვევის პაკეტს.

"თუ ხელფასი შეუწყვიტა და ჯანმრთელობის დაზღვევას უხდიდა, თუ დაგვიდასტურა [რომ მუშაობდა], ჩვენ ვაძლევთ კომპენსაციას. მაგრამ თუ ხელფასის ნაწილის ურიცხავს, ეს ჩვეულებრივი გადაწყობაა და მათ შორის ურთიერთობაა, ამ შემთხვევაში კომპენსაციას არ ვუხდით", — განაცხადა მაჭავარიანმა.

მანვე აღნიშნა, რომ დამადასტურებელი დოკუმენტის გარეშე კომპენსაციას ვერ გასცემენ, რადგან თავად გამოძიებას ვერ ჩაატარებენ, მუშაობდა თუ არა კონკრეტული პირი ძიძად ან მომღერლად.

"სადაც დასტური არ გვაქვს, სამწუხაროდ, ჩვენ უბრალოდ, უძლურები ვართ. თქვენ მობრძანდით და ამბობთ, რომ ამ საქმიანობას ეწეოდით, რაღაცნაირად უნდა დავადასტუროთ. ჩვენ ხომ გამოძიებას ვერ ჩავატარებთ: იყავით მართლა ძიძა, არ იყავით მართლა ძიძა.

ეს ხომ საჯარო ფულია, გადასახადის გადამხდელის ფულია, ამიტომ რაღაც პასუხისმგებლობით უნდა მოვეკიდოთ მის დახარჯვას. როგორც მოგვეპრიანება, ეგრე არ არის, რომ თქვენ მობრძანდით, მე დაგიჯერებთ, რომ ამას შვებოდით. შეიძლება, მღეროდით ყოველ საღამოს რესტორანში, მაგრამ თუ იმ რესტორანმა არ დამიდასტურა, რა უნდა გავაკეთოთ, ისე ვარიგოთ ფული?" — განაცხადა მაჭავარიანმა.

ანტიკრიზისული გეგმის ფარგლებში, მთავრობამ გადაწყვიტა კომპენსაცია ჩაურიცხოს მათ, ვინც პანდემიის გამო სამსახური დაკარგა. კერძოდ, თვითდასაქმებულები ერთჯერადად 300 ლარიან კომპენსაციას მიიღებენ, თუ დაადასტურებენ, რომ მათ შემოსავალი ჰქონდათ. ხოლო დასაქმებულები, რომლებმაც სამსახური დაკარგეს ან უხელფასო შვებულებაში მოუწიათ გასვლას, 6 თვის განმავლობაში 200 ლარს მიიღებენ.

გაიგეთ მეტი: