ევროპული საქართველოს ლიდერი დავით ბაქრაძე ქართული ოცნების პასუხად აცხადებს, რომ მმართველ გუნდსა და ოპოზიციას შორის მიღწეული შეთანხმების დოკუმენტში კონკრეტული სახელი და გვარები არ წერია, რადგან დოკუმენტი ასახავს პრინციპს, რომლითაც უნდა იხელმძღვანელონ. მისივე თქმით, ამ პრინციპის შემუშავების უკან კონკრეტული სახელი და გვარები იყო.

"როგორ წარმოგიდგენიათ, რომ ამ ტიპის დოკუმენტში ეწეროს სახელები და გვარები. წერია, რომ არ უნდა იყოს პოლიტიკურად წინააღდეგობრივი შემთხვევები და სასამართლო არ უნდა ემსახურებოდეს პოლიტიკურ ამოცანას. ამის უკან რა სახელი უნდა ეწეროს? ჩავწეროთ გიგი უგულავა, ხვალ იქნება დათო ბაქრაძეს იჭერენ. ჩავწეროთ დათო ბაქრაძეც, ზეგ იქნებ თეონა ცხომელიძეს იჭერენ.

სახელებზე და გვარებზე კი არ იყო განცხადება, განცხადება იყო პრინციპზე, რომ ყველა ის წინააღდეგობრივი და პოლიტიზირებული საქმე, რომელიც იწვევს არაერთგვაროვან შეფასებებს საზოგადოებაში და პოლიტიკურ სპქეტრში უნდა იყოს გადაწყვეტილი", — განაცხადა მან რუსთავი 2-ის ეთერში.

მანვე აღნიშნა, რომ ამ დოკუმენტში იგულისხმებოდნენ გიგი უგულავა და სხვა დაპატიმრებული პოლიტიკოსები, რასაც ადასტურებს პატრიოტთა ალიანსის ლიდერის, ირმა ინაშვილის ძველი განცხადება. ინაშვილმა აღნიშნა, რომ ამ დოკუმენტს ხელს სწორედ ამ მიზეზის გამო არ მოაწერა.

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან. მმართველი გუნდი კი ამბობს, რომ შეთანხმებაში არ ეწერა არცერთი პოლიტიკოსის გათავისუფლების საკითხი და ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

ოპოზიცია აცხადებს, რომ ამ პირობის შესრულების გარეშე საარჩევნო ცვლილებებს მხარს არ დაუჭერენ. პასუხად მმართველი გუნდი აცხადებს, რომ ოპოზიციას ცვლილებების ჩაგდება სურს.

ამავე თემაზე:

• ბაქრაძე: ჩვენ გვინდა, ამ შეთანხმებას მივცეთ ხმა; მაგრამ ნახევარი შეთანხმება შეთანხმება არ არის
• თალაკვაძე: ვთხოვთ ელჩებს, დაადასტურონ, რომ უგულავას, ოქრუაშვილისა და რურუას გათავისუფლების ვალდებულება არ აგვიღია
• პატიმრების გათავისუფლების პირობა მმართველ გუნდს არავითარი ფორმით არავის წინაშე არ დაუდია — თალაკვაძე
• მოლაპარაკებების დროს პატიმრების საკითხზე ოპოზიციამ 4-ჯერ მიიღო ხისტი პასუხი და არ გაუპროტესტებიათ — კობახიძე

8 მარტს ოპოზიციასა და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.

"ჩვენ ვეთანხმებით საქართველოს მართლმსაჯულების სისტემაში უმაღლესი სტანდარტების დაცვისა და მათი დახვეწისკენ სწრაფვის მნიშვნელობას. მიუხედავად განსხვავებული აზრისა, ყველანი ვთანხმდებით, რომ აუცილებელია რეაგირება ქმედებებზე, რომლებიც შესაძლოა, აღქმულ იქნეს, როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იქნეს აცილებული.

მივესალმებით პრეზიდენტის წინადადებას, მისი საკონსტიტუციო უფლებამოსილების ფარგლებში, თავისუფალი, სამართლიანი და გამჭვირვალე საარჩევნო პროცესის ხელშეწყობასთან დაკავშირებით", — წერია განცხადებაში.