რამდენიმე დღის წინ Euronews-ის გერმანულმა გამოცემამ გაავრცელა ინფორმაცია, რომ მსოფლიოში ცნობილი როკჯგუფის, Rammstein-ის ვოკალისტს, ტილ ლინდემანს კორონავირუსი დაუდგინდა, თუმცა ეს ინფორმაცია თავად ჯგუფმა უარყო.

27 მარტს Rammstein-ის ფეისბუქის ოფიციალურ გვერდზე გამოქვეყნებული განცხადების თანახმად, ტილ ლინდემანს ჯანმრთელობის პრობლემა ნამდვილად ჰქონდა, თუმცა კორონავირუსი არ დაუდასტურდა:

"გუშინ საღამოს ტილ ლინდემანი ბენდის პირადი ექიმის რჩევით საავადმყოფოში მივიდა. მან ღამე ინტენსიური მკურნალობის ქვეშ გაატარა, თუმცა უკვე გამოწერეს და თავს უკეთესად გრძნობს. კორონავირუსზე მისი ტესტირების შედეგი უარყოფითი იყო".

Rammstein ბერლინში 1994 წელს შეიქმნა და ის მსოფლიოში ყველაზე პოპულარული გერმანული მუსიკალური ბენდია. ჯგუფმა ჯერჯერობით ბოლო, მეშვიდე ალბომი გასულ წელს გამოუშვა და არაერთი ქვეყნის მუსიკალურ ჩარტების სათავეებშიც მოხვდა.