თბილისის მერის, კახა კალაძის განცხადებით, თბილისის მიკროავტობუსების მენეჯმენტთან მიმდინარეობს მოლაპარაკება, რომ სამარშრუტო ტაქსების მძღოლები მინიმალური შემოსავლების გარეშე არ დარჩნენ.

"ეს გადაწყვეტილება საკოორდინაციო საბჭოს მიერ მიღებული იქნა სპეციალისტების რეკომენდაციის საფუძველზე, ვინაიდან საზოგადოებრივი ტრანსპორტის სახეობებიდან, მიკროავტობუსი, როგორც უფრო მცირე სივრცის მქონე სატრანსპორტო საშუალება, ვირუსის გავრცელებისთვის ყველაზე მომეტებულ საფრთხის შემცველ ტრანსპორტად იქნა მიჩნეული", — განაცხადა კალაძემ.

თბილისის მერის განმარტებით, სწავლის შეჩერებისა და სერვისების მიწოდების შეზღუდვის გამო ქალაქში დღის მანძილზე ნაკლები ადამიანი გადაადგილდება და მუნიციპალური ტრანსპორტი შეძლებს, მოსახლეობას მოემსახუროს.

ამასთან, კალაძემ აღნიშნა, რომ ხვალიდან ავტობუსებში მძღოლის სივრცე გამოიყოფა, ხოლო კონდუქტორები მუშაობას დროებით შეწყვეტენ.

მძღოლის სივრცე იზოლირებული იქნება ავტობუსის დანარჩენი ნაწილისგან, მოქალაქეები ავტობუსის მხოლოდ ორი უკანა კარით ისარგებლებენ და მძღოლთან უშუალო შეხებაში არ იქნებიან. რაც შეეხებათ ავტობუსის კონდუქტორებს, კალაძე ამბობს, რომ ისინი კუთვნილ ანაზღაურებას უწყვეტად მიიღებენ.

დღეს მთვრობამ ახალი შეზღუდვები და რეკომენდაციებიც გაავრცელა. პრემიერმა კი ხაზი გაუსვა, რომ მათი შესრულება სავალდებულოა.

გაიგეთ მეტი ახალ რეკომენდაციებზე:

პანდემია და რეკომენდაციები

17 მარტის მონაცემებით, საქართველოში კორონავირუსით ინფიცირების 34 შემთხვევაა დაფიქსირებული. ერთ ახალ შემთხვევაზე დღეს ინფექციური საავადმყოფოს დირექტორმა, მარინა ეზუგბაიამ განაცხადა.

34-დან ერთი, პირველი პაციენტი, რომელიც ირანიდან შემოვიდა გამოჯანმრთელდა და გუშინ საავადმყოფოდან გაწერეს. კარანტინში რჩება 1008 ადამიანი, სტაციონარში — 64.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა და უწყებათაშორისი საკოორდინაციო საბჭო მუშაობის საგანგებო რეჟიმზე გადავიდა და შეზღუდვები და რეკომენდაციები გაავრცელა. ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული ისევე, როგორც კაფე-ბარებსა და რესტორნებს. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ასევე, შეიქმნება სპეციალური მექანიზმი, რომელიც საკოორდინაციო საბჭოს გადაწყვეტილებების აღსრულებას შეამოწმებს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: