"ჩვენ ვირუსის შეჩერების ეტაპიდან, გადავდივართ გავრცელების ეტაპზე. ყველანი მზად უნდა ვიყოთ, როგორც მთავრობა, ასევე მოქალაქეები", — განაცხადა პრემიერ-მინისტრმა, გიორგი გახარიამ. მან კიდევ ერთხელ მოუწოდა მოქალაქეებს, რომ გაითვალისწინონ რეკომენდაციები.

მისი თქმით, გავრცელების ეტაპზე გადასვლა პირდაპირ ნიშნავს იმას, რომ ინფიცირებულთა რაოდენობა გაიზრდება:

"ეს არის ობიექტური რეალობა და ჩვენ ამაზე უნდა ვისაუბროთ".

პრემიერის თქმით, თუ მოქალაქეები და კერძო სექტორი მაღალ სამოქალაქო თვითშეგნებას გამოიჩენს, მთავრობის გატარებული ღონისძებები უფრო ეფექტური იქნება.

გაიგეთ მეტი ახალ რეკომენდაციებზე, რომლებიც დღეს საკოორდინაციო საბჭომ გაავრცელა:

პანდემია და რეკომენდაციები

17 მარტის მონაცემებით, საქართველოში კორონავირუსით ინფიცირების 34 შემთხვევაა დაფიქსირებული. ერთ ახალ შემთხვევაზე დღეს ინფექციური საავადმყოფოს დირექტორმა, მარინა ეზუგბაიამ განაცხადა.

34-დან ერთი, პირველი პაციენტი, რომელიც ირანიდან შემოვიდა გამოჯანმრთელდა და გუშინ საავადმყოფოდან გაწერეს. კარანტინში რჩება 1008 ადამიანი, სტაციონარში — 64.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა და უწყებათაშორისი საკოორდინაციო საბჭო მუშაობის საგანგებო რეჟიმზე გადავიდა და შეზღუდვები და რეკომენდაციები გაავრცელა. ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული ისევე, როგორც კაფე-ბარებსა და რესტორნებს. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ასევე, შეიქმნება სპეციალური მექანიზმი, რომელიც საკოორდინაციო საბჭოს გადაწყვეტილებების აღსრულებას შეამოწმებს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: