აშშ–ს გამოძიების ფედერალური ბიუროს (FBI) შეფმა, ჯეიმს კომიმ კონგრესმენებს არჩევნებამდე 2 დღით ადრე გაგზავნილი წერილით აცნობა, რომ FBI რჩება ადრინდელ აზრზე, რომლის მიხედვითაც, ჰილარი კლინტონს არ დაურღვევია კანონი მაშინ, როცა სახელმწიფო მდივნად მუშაობისას მიმოწერისთვის კერძო კომპანიის სერვერს იყენებდა.

ჯეიმს კომის თქმით, FBI-იმ შეისწავლა ელექტრონული შეტყობინებები, რომლებიც საგამოძიებო უწყებამ კლინტონის მრჩევლის, ჰუმბა აბედინის ყოფილი ქმრის, ენტონი ვაინერის კომპიუტერში ცოტა ხნის წინ აღმოაჩინა. შესწავლის შემდეგ უწყებამ დაასკვნა, რომ არაფერი უკანონო ამ მიმოწერებში არ იყო.

ჯეიმს კომიმ აშშ–ს საპრეზიდენტო არჩევნებამდე 11 დღით ადრე, 27 ოქტომბერს, განაცხადა, რომ FBI-მ განაახლა ჰილარი კლინტონის "იმეილების საქმის" გამოძიება ახლადაღმოჩენილი ელექტრონული შეტყობინებების გამო. მის ამ განცხადებას ამერიკულ საზოგადოებაში შოკისმომგვრელი ეფექტი ჰქონდა, რაც დონალდ ტრამპმა საკუთარი მხარდამჭერების მოსაზიდად გამოიყენა და მისი რეიტინგი ჰილარი კლინტონის რეიტინგს თითქმის გაუთანაბრდა.

"იმეილების საქმე" აშშ–ს საპრეზიდენტო მარათონში ჰილარი კლინტონის წინააღმდეგ წარმოებული სპეკულაციების მთავარი იარაღი იყო. ამ საქმის გამოძიება ჯერ კიდევ მაშინ დაიწყო, როცა კლინტონს თავისი საპრეზიდენტო სურვილების შესახებ გაცხადებული არ ჰქონდა. FBI იძიებდა, ხომ არ იყო კანონდარღვევა კლინტონის ქმედება მაშინ, როცა ის სახელმწიფო მდივნის პოსტზე მუშაობისას, ელექტრონული მიმოწერისთვის იყენებდა არა სახელმწიფო სერვერებს, არამედ კერძოს. რამდენიმე თვის წინ FBI-მ საქმის გამოძიება შეაჩერა, რადგან მათი შეფასებით, ეს „დაუდევრობა“ უფრო იყო, ვიდრე დანაშაული. თუმცა, კლინტონი აღნიშნული ქმედების გამო კრიტიკის ქარცეცხლში მაინც გაეხვა, რადგან კერძო სერვერები ჰაკერების სამიზნე უფრო ადვილად შეიძლება გახდეს, ვიდრე სახელმწიფო. შესაბამისად, სახელმწიფო საიდუმლოს გამჟღავნების რისკიც იზრდება თუ მსგავსი ინფორმაცია გაიგზავნა კერძო სერვერის გამოყენებით.