პარასკევს, სომხეთის ყოფილი პრემიერმინისტრი ჰოვიკ აბრაჰამიანი ფულის გათეთრებასა და ძალაუფლების ბოროტად გამოყენების ბრალდებით დააკავეს, — იტყობინება სომხეთის ანტიკორუფციული კომიტეტი.

Armenpress-ის ცნობით, კომიტეტმა განაცხადა, რომ აბრაჰამიანს ბრალი ფულის გათეთრების, ძალაუფლების ბოროტად გამოყენებისა და უკანონო მეწარმეობის არაერთი ბრალდებით აქვს წაყენებული.

მედიის ინფორმაციით, იგი დაკავებულია მიმდინარე სისხლის სამართლის გამოძიების ფარგლებში, თუმცა დამატებითი დეტალები ამ ეტაპზე არ გავრცელებულა.

აბრაჰამიანი პრემიერმინისტრი 2014 წლიდან 2016 წლამდე პრეზიდენტ სერჟ სარგსიანის მმართველობის პერიოდში იყო და მმართველი რესპუბლიკური პარტიის ერთ-ერთ მნიშვნელოვან ფიგურას წარმოადგენდა. მანამდე ის პარლამენტის თავმჯდომარის თანამდებობასაც იკავებდა 2012–2014 წლებში, ასევე მას 1990-იანი წლებიდან სხვადასხვა სახელმწიფო თანამდებობა ეკავა, მათ შორის, მინისტრის პოსტები პრეზიდენტ რობერტ ქოჩარიანის მმართველობის დროს.

არსებობს დაუდასტურებელი ცნობები, რომ ჩხრეკა ჩატარდა აბრაჰამიანის საცხოვრებელ სახლში. RFE/RL-ის თანახმად, კომიტეტი გეგმავს სასამართლოს მიმართოს შუამდგომლობით, რომ აბრაჰამიანს 3-თვიანი წინასწარი პატიმრობა შეუფარდონ.

აბრაჰამიანის წინააღმდეგ სისხლის სამართლის საქმე 2018 წელს აღიძრა,— უკანონო მეწარმეობაში მონაწილეობასა და სამსახურებრივი უფლებამოსილების ბოროტად გამოყენების ბრალდებით. 2023 წელს მას დამატებით ფულის გათეთრების ბრალდება წარედგინა.

RFE/RL-ის ინფორმაციით, აბრაჰამიანი ბრალდებულია, 2008 წელს "ავაზაჰატიკის" ქვიშის საბადოს კომპანია Avazahatik-ის 60%-იან წილს უკანონოდ დაუფლებისთვის. რის შემდეგაც 2015 წლამდე მან 230 მილიონი დრამის (დაახლოებით 585,000 დოლარის) უკანონო შემოსავალი მიიღო. იგი ამ შემოსავალს საკუთარი ლეგალური შემოსავლების წყაროებთან აერთიანებდა, რათა დაეფარა ფულის უკანონო წარმოშობა. შემდგომში ეს თანხები ქონების შესაძენად და საბანკო ოპერაციების ჩასატარებლად გამოიყენებოდა.

სომხეთის ხელისუფლება, აბრაჰამიანის, მისი ნათესავებისა და მასთან დაკავშირებული პირებისთვის 59 უძრავი ქონების და 26 მილიარდი დრამის (დაახლოებით 66 მილიონი დოლარის) ჩამორთმევას მოითხოვს. აბრაჰამიანის დაკავება სპარლამენტო არჩევნებამდე ერთი წლით ადრე მოხდა, არჩევნები 2026 წლის ივნისშია დანიშნული.

ამავე კვირაში, სომხეთის გენერალურმა პროკურორმა პარლამენტს თხოვნით მიმართა, ორი ოპოზიციონერი დეპუტატისთვის მოეხსნათ იმუნიტეტი, რათა შესაძლებელი გამხდარიყო მათ წინააღმდეგ სისხლის სამართლის საქმის აღძვრა. აღნიშნული მოთხოვნა მას შემდეგ გაჩნდა, რაც პრემიერმინისტრმა ნიკოლ ფაშინიანმა ოპოზიცია კორუფციაში დაადანაშაულა და პარლამენტის სხდომაზე განაცხადა, რომ "ისინი სახელმწიფო უსაფრთხოების სამსახურის სარდაფში აღმოჩნდებიან".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.