რუსეთის ფედერაციაში, ტიუმენის ოლქში, კერძოდ ხანტი-მანსიისკის ავტონომიურ ოკრუგში (უგრა) მცხოვრებ მართლმადიდებლებს საქართველოში მომლოცველობას 60 000 რუბლად (2090 ლარის ეკვივალენტი) სთავაზობენ.

როგორც რუსული მედია წერს, ამ ფასში არ შედის ავიაბილეთის ფასი ხანტი-მანსიისკიდან "მინერალნიე ვოდამდე", რომლის ღირებულებაც 25 000 რუბლია (870 ლარის ეკვივალენტი). ამის შესახებ ინფორმაციას რუსეთის მართლმადიდებლური ეკლესიის ხანტი-მანსიისკის ეპარქიის მომლოცველთა განყოფილება ავრცელებს.

მათი ცნობით, საქართველოში მოგზაურობა 22-დან 29 ოქტომბრამდე გაიმართება. მომლოცველობის ღირებულებაში შედის — განთავსება, კვება და ექსკურსიები. ექსკურსიების პროგრამა მოიცავს: საქართველოს სამხედრო გზის ტაძრებისა და მონასტრების, ქალაქ თბილისის, ჯვრის, სამთავროს, მცხეთის, ბოდბეს, დავით გარეჯის და სხვა ღირსშესანიშნავი ადგილების მონახულებას.

"საქართველო მდიდარი ისტორიული წარსულის მქონე ქვეყანაა, რომელმაც ქრისტიანობა პირველ საუკუნეში მიიღო, ეს არის ქვეყანა უძველესი ისტორიით, მომხიბვლელი პეიზაჟებითა და უნიკალური ატმოსფეროთი. აქ შემორჩენილია ციხესიმაგრეები და ტაძრები, რომლებიც თურქებისა და სპარსელების შემოსევებს, "ოქროს ხანის" ეპოქას და თამარ დედოფლის მეფობას გვახსენებს. საქართველოში მომლოცველობა სულიერი მოგზაურობაა ქვეყნის წმინდა ადგილებში, რომლებსაც უდიდესი მნიშვნელობა აქვს მთელი ქრისტიანული სარწმუნოებისთვის", —- ნათქვამია ეპარქიის მიერ გავრცელებულ ინფორმაციაში.