თიკა რუხაძემ კულტურის მინისტრად დანიშვნის წინა დღეს €8100-იანი ჩანთა იყიდა

თიკა რუხაძემ კულტურის მინისტრად დანიშვნის წინა დღეს, 2024 წლის 17 ოქტომბერს, 8100-ევროდ (23 949 ლარი) შეფასებული ჩანთა იყიდა. ინფორმაციას "რადიო თავისუფლება" თიკა რუხაძის დეკლარაციაზე დაყრდნობით ავრცელებს.

აღსანიშნავია, რომ თიკა რუხაძემ გასულ წელსაც შეიძინა ძვირადღირებული ჩანთა, რომლის ფასიც 5995 ევროა (17 350 ლარი).

ამასთან, ოცნების კულტურის მინისტრი ფლობს ორ ბინას თბილისში, მათ შორის ერთი (135 კვ/) ფალიაშვილის ქუჩაზე 2024 წელს იყიდა 300 000 დოლარად, მეორეს კი 2010 წლიდან ფლობს საბურთალოზე, ვაჟა-ფშაველას გამზირზე, მასში 100 000 ლარია გადახდილი.

თინათინ რუხაძეს, 2024 წლის 1 დეკემბრის მონაცემებით, საბანკო ანგარიშებზე 130 000 დოლარზე მეტი ჰქონდა .

გარდა ამისა ფლობს ნაღდი ფულის სახით 60 000 ლარს და 50 000 დოლარს.

დეკლარაციის ჩანაწერიდან ირკვევა, რომ ის "ახალგაზრდობის ეროვნული სასახლის" დირექტორობის პარალელურად იკავებდა მრჩევლის თანამდებობას შპს "ბიზნეს კონსალტინგ კომპანიასა" და შპს "თიხარტში". ჯამში მან მიიღო 400 000 ლარზე მეტი.