სახელმწიფო უსაფრთხოების სამსახურის უფროსის ყოფილი მოადგილე, ალექსანდრე ტაბატაძე გენერალურ პროკურატურაში ჟურნალისტებს ჩორჩანის ეპიზოდთან დაკავშირებით გამოკითხვის დასრულების შემდგომ ესაუბრა.

მისი თქმით, ჩორჩანაში საგუშაგოს გახსნის შესახებ მან მას შემდეგ გაიგო, რაც ვითარება დაიძაბა.

"მე გავიგე იმის მერე, როდესაც სახელმწიფო უსაფრთხოების სამსახურში იმართებოდა თუნდაც უფროსთან შეკრებები და რომ ვნახეთ, რომ იქ მდგომარეობა დაიძაბა. სეპარატისტულმა რეჟიმმა იქ რამდენჯერმე შეატყობინა საერთაშორისო ორგანიზაციებს. მერე, იყო ასეთი ინფორმაცია, რომ მძიმე ტექნიკა გამოიყვანეს და ა.შ. რა თქმა უნდა ამის შემდეგ უსაფრთხოების სამსახური ჩაერთო როგორ უნდა შეეწყვიტა [მშენებლობა] სახელმწიფო უსაფრთხოების სამსახურს. მე არ მქონდა ბახტაძესთან წვდომა",― თქვა ალექსანდრე ტაბატაძემ.

მისივე თქმით, ქართულმა ოცნებამ ცეცხლის გახსნის საშიშროება აირიდა თავიდან.

"ეროვნული უსაფრთხოების საბჭოს შეკრება არ არის ეს პანაცია. გინდა თუ არა, უნდა შეიკრიბოს უსაფრთხოების საბჭო. რაც საჭიროა, ის გაკეთდა და მთავარი ის არის, რომ ჩვენ ავიცილეთ საშიშროება იმისა, რომ მომხდარიყო იქ ცეცხლის გახსნა,"― აღნიშნა ალექსანდრე ტაბატაძემ.

მისი თქმით, ამ ამბის შემდეგ გიორგი გახარიას პრემიერმინისტრად დანიშვნა პოლიტიკური გადაწყვეტილება იყო, რომელიც მთავრობამ დამოუკიდებლად მიიღო.

"ეს არის პოლიტიკური გადაწყვეტილება. საქართველოს უახლეს ისტორიაში 2012 წლიდან გვყავს ხელისუფლება, რომელიც იღებს დამოუკიდებელ გადაწყვეტილებებს,"― თქვა მან.