2025 წლის საბავშვო ევროვიზიის სიმღერის კონკურსს თბილისის ახალი სპორტის სასახლე უმასპინძლებს. უფრო ზუსტად, ღონისძიება 13 დეკემბერს გაიმართება სასახლის მცირე დარბაზში. ინფორმაცია ამის შესახებ საქართველოს მთავრობის ადმინისტრაციის უფროსმა ლევან ჟორჟოლიანმა გაავრცელა. ჟორჟოლიანის თქმით, მონაწილე ქვეყნების დელეგაციები საქართველოში ათი დღით ადრე ჩამოვლენ, რათა "კიდევ უფრო კარგად გაიცნონ" ქართული კულტურა.

ახალი სპორტის სასახლე, იგივე ოლიმპიური სასახლე, 2015 წელს აშენდა თბილისის ახალგაზრდული ოლიმპიადისთვის. შენობა თავდაპირველად დიდ და მცირე (800-ადგილიან) დარბაზებს აერთიანებდა. 2017 წელს საბავშვო ევროვიზია სწორედ დიდ დარბაზში ჩატარდა. თუმცა, მას შემდეგ სასახლეს კიდევ ერთი, უფრო დიდი ნაგებობა დაემატა — თბილისი არენა, რომელიც საკალათბურთო დარბაზია და 10 ათასამდე მაყურებელს იტევს. ამდენად, ჟორჟოლიანის ხსენებულ მცირე დარბაზში, შესაძლოა, სწორედ ის არენა იგულისხმებოდეს, რომელმაც 2017 წლის ევროვიზია ჯუნიორს უმასპინძლა. ეს დარბაზი კონცერტებზე 4 ათასამდე მაყურებელს იტევს.

თბილისის ოლიმპიურმა სასახლემ საბავშვო ევროვიზიას 2017 წელსაც უმასპინძლა

ფოტო: პირველი არხი

საბავშვო ევროვიზიის გამარჯვებული გასულ წელს საქართველო გახდა. ჩვენს ქვეყანას რეკორდული მეოთხე გამარჯვება 11 წლის ანდრია ფუტკარაძემ მოუტანა, გიგა კუხიანიძის სიმღერით დედას. ანდრიას გამოსვლა 16 მონაწილე ქვეყნიდან 12-მა უმაღლესი ქულით შეაფასა. გამარჯვებიდან მალევე, საქართველოს საზოგადოებრივმა მაუწყებელმა მომდევნო ევროვიზია ჯუნიორის მასპინძლობისთვის მზადყოფნა გამოთქვა.

2025 წლის საბავშვო ევროვიზიის შესახებ სხვა დეტალები კი ჯერჯერობით უცნობი რჩება. ამ დროისათვის, წლევანდელ საბავშვო ევროვიზიაზე მონაწილეობის სურვილი 11-მა ქვეყანამ გამოთქვა. მათ შორისაა კონკურსის პირველი გამარჯვებული, ხორვატია, რომელიც ევროვიზია ჯუნიორს ხანგრძლივი, 11-წლიანი პაუზის შემდეგ უბრუნდება.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...