სოციალ-დემოკრატების წევრი, გია ჟორჟოლიანი ამბობს, რომ ოლქების საზღვრების საკითხს მათთვის პოლიტიკურად პრინციპული მნიშვნელობა არ აქვთ. ამის შესახებ მან კვირის პრესკლუბში ისაუბრა. მისი თქმით, ამომრჩეველი არჩევნებზე გადაწყვეტილებას ოლქების საზღვრების გამო, არამედ იმ პროგრამის და ხედვის მიხედვით იღებს, რაც ამა თუ იმ პარტიას აქვს.

"მთავარია, რას გააკეთებს პარტია, როცა იქნება მთავრობაში... ახლა ვინ რას შეეცდება, რა თქმა უნდა, ამის სპეციალისტები, როგორ მოახდინონ ოლქების, არჩევნების გაყალბების მანიპულაციები, არა უპირველეს ყოვლისა ქართულ ოცნებაში, სხვა პარტიებშია. მოგეხსენებათ, უდიდესი გამოცდილება აქვთ იმ ადამიანებს, რომლებიც ევროპულ საქართველოსა და ნაციონალურ მოძრაობაში არიან", — განაცხადა გია ჟორჟოლიანმა.

8 მარტს ოპოზიცია და მმართველი გუნდი საპარლამენტო არჩევნების 120/30-ზე სისტემით ჩატარებაზე შეთანხმდნენ. რაც იმას გულისხმობს, რომ 2020 წლის არჩევნებში პროპორციული სიით 120 დეპუტატი აირჩევა, მაჟორიტარულით კი — 30.

საპარლამენტო უმრავლესობის წევრის, ირაკლი კობახიძის თქმით, 2020 წლის არჩევნებისთვის 30 მაჟორიტარული ოლქის გადანაწილების მონახაზი უკვე შემუშავებული აქვთ. მისი თქმით, ზოგიერთი ოლქის შემთხვევაში 4-5 მუნიციპალიტეტი გაერთიანდება. კობახიძის ინფორმაციით, მაჟორიტარული ოლქიდან 18 აღმოსავლეთ საქართველოში იქნება, 12 — დასავლეთში. როგორც კობახიძე ამბობს, თბილისში 7 მაჟორიტარული ოლქი იქნება, ქუთაისში, ბათუმსა და რუსთავში თითო-თითო ოლქი.

ოპოზიციის წევრები ამბობენ, რომ ქართული ოცნება ახალი სისტემით მაჟორიტარული ოლქების საკუთარ თავზე მორგებას ცდილობს.