12 არასამთავრობო ორგანიზაცია ინფორმაციული უსაფრთხოების შესახებ საქართველოს პარლამენტში წარდგენილ კანონპროექტს აკრიტიკებს. ორგანიზაციებს მიაჩნიათ, რომ შემუშავებული უნდა იყოს მართვის მოდელი, რომელიც უზრუნველყოფს ინფორმაციული უსაფრთხოების სისტემის გამჭვირვალობას და ეფექტურობას.

ცვლილებების თანახმად, სახელმწიფო უსაფრთხოების სამსახურის (სუს) სსიპ ოპერატიულ-ტექნიკური სააგენტო (OTA) ხდება ის ორგანო, რომელიც შეითავსებს ერთი მხრივ, უწყებებს შორის მარეგულირებლის, აკრედიტაციის გამტარებლის და აღმასრულებლის, ხოლო, მეორე მხრივ, კონტროლის განმახორციელებელი და ზედამხედველი ორგანოს ფუნქციები.

ორგანიზაციების განცხადებით, ცენტრალიზებული და დაუბალანსებელი სისტემა შეუძლებელია, იყოს ეფექტური და გაუმჯობესებაზე ორიენტირებული:

"სახელმწიფო უსაფრთხოების სამსახური არის ძალოვანი უწყება, რომელსაც, უსაფრთხოების მიზნებიდან გამომდინარე, პირდაპირი ინტერესი აქვს, რომ ჰქონდეს მაქსიმალური წვდომა სხვადასხვა ინფორმაციულ ინფრასტრუქტურაზე. იგი ადვილად შეძლებს ამ ინტერესის დაკმაყოფილებას, თუ აღჭურვილი იქნება სამართლებრივი მექანიზმებით".

ორგანიზაციების განცხადებაში ნათქვამია, რომ კანონპროექტის მიხედვით, დაუბალანსებელი და არათავსებადია მონაცემთა გაცვლის სააგენტოს (DEA) უფლება-მოვალეობები:

"იკვეთება, კერძო ორგანიზაციების ინფორმაციული სისტემების მართვის პროცესში უხეში და გაუმართლებელი ჩარევის რისკი. ამასთანავე, თუ ბანკები მიჩნეული იქნება კრიტიკული ინფორმაციული სისტემის სუბიექტად მონაცემთა გაცვლის სააგენტოს და ეროვნული ბანკის სახით გვექნება ორი განსხვავებული ბიუროკრატია დუბლირებული ფუნქციებით".

განცხადებაში, ასევე, ვკითხულობთ, რომ კანონპროექტი ქმნის პერსონალურ მონაცემთა დამუშავების შესაძლებლობას სასამართლოს ნებართვის გარეშე. ორგანიზაციების განცხადებით, კანონპროექტი არ შეესაბამება საქართველოს კონსტიტუციას, ვინაიდან არსებობს ადამიანის პირადი სივრცის ხელშეუხებლობის დარღვევის საფრთხე.

ხელმომწერი ორგანიზაციებია:

  • საქართველოს ინფორმაციული უსაფრთხოების ასოციაცია;
  • Cyber House;
  • ინფორმაციის თავისუფლების განვითარების ინსტიტუტი (IDFI)
  • მედიის განვითარების ფონდი (MDF);
  • მცირე და საშუალო ტელეკომოპერატორთა ასოციაცია;
  • საქართველოს სამეცნიერო-საგანმათლებლო კომპიტერული ქსელების ასოციაცია (GRENA);
  • ადამიანის უფლებების მონიტორინგისა და სწავლების ცენტრი (EMC);
  • საქართველოს ახალგაზრდა იურისტთა ასოციაცია;
  • საქართველოს ღია საზოგადოების ფონდი;
  • საერთაშორისო გამჭვირვალობა-საქართველო;
  • რეგიონულ მაუწყებელთა ალიანსი;
  • ლიბერალური აკადემია.