შობის წინ ტეილორ სვიფტმა კიდევ ერთხელ დაამტკიცა, რომ ქველმოქმედება მისთვის მხოლოდ სიტყვები არ არის. გლობალურმა სუპერვარსკვლავმა საერთო ჯამში 2 მილიონი დოლარი შესწირა ორ ორგანიზაციას — Feeding America-სა და American Heart Association-ს (AHA).

Feeding America-მ, რომელიც აშშ-ში საკვები ბანკების, საკვების გამცემი პუნქტებისა და ადგილობრივი კვების პროგრამების ფართო ქსელს კოორდინირებს, დაადასტურა, რომ სვიფტმა ორგანიზაციას 1 მილიონი დოლარი შესწირა. ორგანიზაციის აღმასრულებელმა დირექტორმა, კლერ ბაბინო-ფონტენომ, განაცხადა, რომ ეს მხარდაჭერა განსაკუთრებით მნიშვნელოვანია იმ პერიოდში, როცა შიმშილის პრობლემა კიდევ უფრო გამწვავდა.

მისი თქმით, 2025 წლის განმავლობაში Feeding America იმაზე მეტ მოთხოვნას აწყდება, ვიდრე შეუძლია დააკმაყოფილოს, ხოლო აშშ-ში ოჯახების დაახლოებით 14% საკვებზე ხელი არ მიუწვდება. "როცა მოშიმშილე ადამიანებს მხარს ვუჭერთ, შეგვიძლია უზრუნველვყოთ, რომ ოჯახებს ამ დღესასწაულზე და მის შემდეგაც სავსე სუფრა ჰქონდეთ", — აღნიშნა ბაბინო-ფონტენომ.

მეორე მილიონი ტეილორ სვიფტმა American Heart Association-ს შესწირა მამის, სკოტ სვიფტის პატივსაცემად. როგორც ცნობილია, სვიფტის მამამ წელს გულ-სისხლძარღვთა დაავადების გამო ხუთმაგი კორონარული შუნტირების ოპერაცია გადაიტანა.

AHA-ის აღმასრულებელმა დირექტორმა, ნენსი ბრაუნმა, თქვა, რომ სვიფტის შემოწირულობა მნიშვნელოვნად სცდება ფინანსურ მხარდაჭერას და საზოგადოებაში გულის ჯანმრთელობაზე ცნობიერების ამაღლებას შეუწყობს ხელს. მისი თქმით, გულ-სისხლძარღვთა დაავადებები ამერიკელთა თითქმის ნახევარს ეხება და პრევენცია გადამწყვეტ მნიშვნელობას ატარებს.

სკოტ და ტეილორ სვიფტები 2011 წლის CMT Artists of the Year-ის ცერემონიაზე, ნეშვილი

ფოტო: Rick Diamond / Getty Images

სვიფტს შემოწირულობებთან დაკავშირებით საჯარო კომენტარი არ გაუკეთებია, თუმცა ეს ქმედება მისი მრავალწლიანი გულუხვობის გაგრძელებაა. წლების განმავლობაში მომღერალმა მილიონობით დოლარი შესწირა სტიქიური უბედურებების შედეგად დაზარალებულებს, განათლების პროგრამებსა და სოციალურ ინიციატივებს.

2023 წელს, მისი რეკორდული Eras Tour-ის ფარგლებში, სვიფტმა საკვები ბანკებიც არაერთხელ დააფინანსა. მოგვიანებით კი დოკუმენტურ სერიალში End of an Era გაამხილა, რომ ტურნეს გუნდს ბონუსები გაუზარდა მას შემდეგ, რაც ტურნემ საერთაშორისო მუსიკალური რეკორდები მოხსნა და ბილეთების გაყიდვებიდან 2 მილიარდ დოლარზე მეტი შემოსავალი მიიღო.