პარლამენტის თავმჯდომარე, არჩილ თალაკვაძე ვაშინგტონში, კონგრესმენებთან შეხვედრის შემდეგ ამბობს, რომ საარჩევნო სისტემაზე თებერვლის ბოლოს ოპოზიციასთან "მოლაპარაკების ფანჯარა დაიხურება". თალაკვაძის თქმით, წინააღმდეგ შემთხვევაში, ისინი ვეღარ მოასწრებენ არჩევნებამდე შეიტანონ ცვლილებები კონსტიტუციაში:

"თებერვლის ბოლომდე მნიშვნელოვანია, ჩვენ ვნახოთ ოპოზიციის პრაგმატული პასუხი ამ [100/50-ზე] შეთავაზებაზე... ოპოზიციის ნაწილს, რომლებსაც არ აქვთ ხალხის მხარდაჭრა და რაიმე იმედი, რომ არჩევნებში რაიმე შედეგს აჩვენებენ, მათი ერთადერთი ამოცანაა, დესტრუქცია და როგორმე არ მიიღონ მონაწილეობა არჩევნებში".

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველმა გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.