ამერიკელი კონგრესმენი, ადამ კინზინგერი ვაშინგტონში პარლამენტის თავმჯდომარესთან, არჩილ თალაკვაძესთან შეხვედრის შემდეგ ამბობს, რომ მათი შეშფოთება არ ნიშნავს "იმედგაცრუებას" ან "სიბრაზეს". რუსთავი 2-ის თარგმანის მიხედვით, კონგრესმენი განმარტავს, რომ სურთ დარწმუნდნენ, ადრინდელივით მუშაობს, თუ არა საქართველოში დემოკრატია.

ჟურნალისტების კითხვაზე, რომ ხელისუფლება მათთვის ოპოზიციის მხრიდან მიწოდებულ მცდარ გზავნილებზე საუბრობს, კინზინგერი პასუხობს, რომ ყველაზე მეტი კომუნიკაცია მთავრობასთან აქვთ:

"ჩვენ ვართ შეშფოთებული და ამას გამოვხატავთ, თუმცა შეშფოთება არ უნდა იქნას იმედგაცრუენად ან სიბრაზედ აღქმული. ის უნდა აღვიქვათ ვითარებად, რომელიც მეგობრებს შორის არის. ჩვენთვის საქართველო ძალიან მნშვენლოვანია, და ვფიქრობ, საქართველოსთვისაც ასეა. ახლა ჩვენ უნდა მივიღოთ რეზოლუცია და ვაგრძელებთ საქართველოსადმი ერთგულებას. ნებისმიერი შეშფოთება რომელიც ჩვენ შორის არის, აშშ-ს ვალდებულებაა საქართველოსადმი. საქართველოთი რომ არ ვიყოთ დაინტერესებული, არ ვინაღვლებდით. გავაგრძელებთ დიალოგს რომ გადავჭრათ არსებული კრიზისი".

პარლამენტის სპიკერი, არჩილ თალაკვაძე ვაშინგტონში შეხვედრებს მართავს. მისი თქმით, ამერიკელ კონგრესმენებთან "ინტენსიურ კომუნიკაციას" მართავენ და პოლიტიკურ კონტექსტზეც "სრულ არგუმენტაციას" მიაწვდიან. გარდა ამისა, გაზაფხულზე ამერიკის შეერთებულ შტატებს ოფიციალური ვიზიტით პრემიერ-მინისტრი გიორგი გახარიაც ეწვევა.

ვიზიტები მას შემდეგ დაიგეგმა, რაც ამერიკელმა კონგრესმენებმა და სენატორებმა მთავრობას კრიტიკული წერილები გაუგზავნეს. მათი შეშფოთების საფუძელი გახდა პროპორციული არჩევნების დაპირების ჩაგდება, უზენაეს მოსამართლეების არჩევის პროცესი, საპროტესტო აქციების ძალადობრივად დაშლა და ა.შ.

საქართველოს მთავრობის წარმომადგენლებმა, ისევე როგორც პარლამენტის დეპუტატებმა კრიტიკა კონგრესმენების "პირად ინტერესებსა" და "ცალმხრივ ინფორმაციას" დააბრალეს.

კონგრესმენების/სენატორების კრიტიკა

29 იანვარს, შეერთებული შტატების სენატის საგარეო კომიტეტის თავმჯდომარემ, რესპუბლიკელმა სენატორმა ჯიმ რიშმა და ევროპის ქვეკომიტეტის დემოკრატმა ლიდერმა, სენატორმა ჯინ შაჰინმა საქართველოს პრემიერ-მინისტრ გიორგი გახარიას წერილით მიმართეს. წერილი საქართველოს დემოკრატიულ უკუსვლაზე, ოპოზიციის ლიდერების სამართლებრივ დევნაზე საუბრობს და საქართველოს მთავრობას მოუწოდებს დაიცვას დემოკრატიული პრინციპები. სენატორები აცხადებენ, რომ წინააღმდეგ შემთხვევაში შესაძლებელია, ორი ქვეყნის პარტნიორობის საკითხი გადაიხედოს.

გაიგეთ მეტი სენატორების წერილზე:

• აშშ-ს სენატის წევრები საქართველოს მთავრობას გამაფრთხილებელი წერილით მიმართავენ
• პოლიტიკური მოკავშირეების უზენაეს სასამართლოში დანიშვნა დემოკრატიულ ინსტიტუტებს უთხრის ძირს — სენატორები

სენატორებამდე კრიტიკულ წერილებს საქართველოს მთავრობას კონგრესმენები უგზავნიდნენ. ისინი პროპორციული საარჩევნო სისტემის ჩაგდების, ანაკლიის პორტის საკითხის, დემონსტრანტების დაშლისა და ოპოზიციის ლიდერების წინააღმდეგ აღძრული საქმეების გამო აკრიტიკებდნენ ხელისუფლებას/

გაიგეთ მეტი კონგრესმენების წერილებზე:

• საკონსტიტუციო რეფორმის ჩავარდნა საჩუქარია პუტინისთვის — კონგრესმენი
• გაოგნებულები ვართ პროპორციულ სისტემაზე გადასვლის რეფორმის ჩაგდების გამო — კონგრესმენები გახარიასთვის მიწერილ წერილში
• საქართველო პირველად განიხილებოდა უარყოფით შუქზე და სიფრთხილით — ამერიკელი კონგრესმენი გახარიას
• პოლიტიკური დევნა და ეკონომიკური ვარდნის ტენდენცია — აშშ-ს ოთხი კონგრესმენის წერილი გახარიას
• არჩევნები, ანაკლიის პორტი, FB-ს გაუქმებული ანგარიშები — რა საკითხებზე მიწერეს კონგრესმენებმა გახარიას
• პროპორციული არჩევნები, პოლიტიკური დევნა, უზენაესი სასამართლო — ჰელსინკის სენატორის წერილი
• საქართველოს მთავრობა თავს ესხმის დემოკრატიულ ფასეულობებს — კონგრესმენი პიტ ოლსონი
• ბიძინა ივანიშვილი პუტინის მარიონეტია — კონგრესმენი პიტ ოლსონი