რესპუბლიკელი კონგრესმენი პიტ ოლსონი საქართველოს მთავრობის მიმართ მორიგ კრიტიკულ განცხადებას ავრცელებს. კონგრესმენმა აშშ-ს წარმომადგენლობით პალატაში თავისი გამოსვლის ვიდეო საკუთარ ტვიტერზე გაავრცელა. როგორც კონგრესმენი წერს, მან ქართველი ხალხის მხარდასაჭერად ისაუბრა და საქართველოს ხელისუფლებას კორუფციისა და რუსული გავლენის დასრულებისკენ მოუწოდა.

კონგრესმენი თავის გამოსვლაში, ბიძინა ივანიშვილს ამერიკული შოუს გმირს, გრაუჩ ოსკარს ადარებს, რომელიც ნაგვის ურნაში ცხოვრობს და უსარგებლო ნივთებს აგროვებს. ოლსონის თქმით, ივანიშვილიც და გრაუჩ ოსკარიც მარიონეტები არიან, რომლებიც თავიანთ სახლს ანაგვიანებენ.

კონგრესმენი კვლავ ეხება კომპანია ფრონტერას თემას და ამბობს, რომ ვლადიმერ პუტინი ბედნიერია, რადგან საქართველოს ნავთობს აკონტროლებს. ოლსენი მოუწოდებს კოლეგებს, რომ საქართველოს მხარდასაჭერად შემოუერთდნენ.

"ვლადიმერ პუტინის მარიონეტი საქართველოში უცხოურ ინვესტიციებსა და ადამიანის ძირითად უფლებებს ანადგურებს. ტეხასურმა კომპანიამ ამერიკასა და საქართველოში სამუშაო ადგილები შექმნა, შექმნეს თავისუფლება. ასე იყო, სანამ საქართველოს ხელისუფლება მათ სამუშაო ტექნიკას წაართემვდა", — განაცხადა პიტ ოლსონმა.

პიტ ოლსონმა საქართველოს მთავრობა რამდენიმე დღის წინაც გააკრიტიკა. მან ტვიტერის გვერდზე კონგრესმენ ადამ კინზინგერის ტვიტი გააზიარა და განაცხადა, რომ კორუმპირებული საქართველოს მთავრობა თავს ესხმის დემოკრატიულ ღირებულებს.

"ვეთანხმები ჩემს კოლეგას ადამ კირზინგერს. კორუმპირებული საქართველოს მთავრობა თავს ესხმის დემოკრატიულ ფასეულობებს, იყენებს სასტიკ მეთოდებს მშვიდობიანი პროტესტის მონაწილეების წინააღმდეგ და უპირისპირდება ამერიკული ინვესტიციებს, რომელიც ორივე ქვეყნისთვის კარგის მომტანია. ქართველი ხალხი უკეთესს იმსახურებს!", — წერდა კონგრესმენი.