სახალხო დამცველ, ნინო ლომჯარიას თქმით, საარჩევნო სისტემას დაკავშირებით ეუთო/ოდირის დასკვნაში ოპოზიციის მიერ შემუშავებული კანონპროექტის კონსტიტუციურობაზე საუბარი არ არის. მისი თქმით, შესაძლებელი იყო, რომ მათი მხრიდან გარკვეული ნიშნები ირიბად გაკეთებულიყო.

როგორც ლომჯარია ამბობს, ოპოზიციის კანონპროექტის კონსტიტუციურობის დადგენა საქართველოში შეუძლებელია, რადგან ქართული საკონსტიტუციო სასამართლო მხოლოდ ძალაში შესულ კანონების კონსტიტუციურობას განიხილავს.

"ეუთო/ოდირმა განაცხადა, რომ ის საერთოდ ვერ იმსჯელებს არის თუ არა კანონპროექტი კონსტიტუციასთან შესაბამისობაში. მან თქვა, რომ ეს უნდა გადაწყვიტოს ეროვნულმა სასამართლოებმა, ამ შემთხვევაში საქართველოში ასეთი სასამართლო არის საკონსტიტუციო სასამართლო. თუმცა, ჩვენთან საკონსტიტუციო სასამართლო არ განიხილავს კანონპროექტის კონსტიტუციურობას, ის განიხილავს უკვე ძალაში შესული კანონების, ნორმატიული აქტების კონსტიტუციურობას", — განაცხადა ლომჯარიამ.

ომბუდსმენის თქმით, ეუთო/ოდირმა თქვა, რომ არ აქვს მნიშვნელობა, ქვეყანა რა ტიპის საარჩევნო სისტემას აირჩევს, მაგრამ საერთაშორისო სტანდარტი ამბობს, რომ საარჩევნო სისტემა უნდა იყოს შერჩეული ფართო, ინკლუზიური დებატის და ფართო პოლიტიკური კონსესუსის საფუძველზე.

ეუთო/ოდირის დასკვნა საარჩევნო სისტემის ცვლილებაზე გუშინ, 5 თებერვალს გამოქვეყნდა. ეუთოს დოკუმენტში აღნიშნულია, რომ საარჩევნო მოდელთან დაკავშირებით გადაწყვეტილების მიღება ქვეყნის სუვერენული უფლებაა, თუმცა ასევე, წერია ისიც, რომ კანონის კონსტიტუციასთან შესაბამისობაზე საბოლოო გადაწყვეტილება ადგილობრივმა სასამართლოებმა უნდა მიიღონ.

დოკუმენტში აღნიშნულია ისიც, რომ შემოთავაზებული ე.წ. გერმანული მოდელი აკმაყოფილებს უნივერსალური, თავისუფალი, ფარული და პირდაპირი ხმის მიცემის, ასევე, პერიოდული არჩევნების პრინციპებს.