ახალ კრიტიკულ წერილში, რომელიც ამჯერად სენატის საგარეო ურთიერთობათა კომიტეტის წევრებმა გამოუგზავნეს მთავრობას, ხაზგასმულია, რომ საქართველოსა და აშშ-ის პარტნიორობა შესაძლოა კითხვის ნიშნის ქვეშ დადგეს. აქამდე ხელისუფლება ამტკიცებდა, რომ კრიტიკული წერილების მიუხედავად, სტრატეგიულ პარტნიორობას საფრთხე არ ემუქრება.

მიზეზად სენატორები ბოლოდროინდელ მოვლენებს ასახელებენ, რომლებმაც მათი თქმით, კითხვები გააჩინა საერთო ღირებულებების არსებობაზე.

"ჩვენ წლებია შეერთებულ შტატებსა და საქართველოს შორის პარტნიორობის მტკიცე მხარდამჭერები ვართ და ჯერ ისევ გვჯერა, რომ თქვენ გაქვთ ძლიერი დემოკრატიული საფუძველი. თუმცა, ეს მოვლენები ჩვენ გვაჩერებს და გვიჩენს კითხვებს ჩვენი საერთო ღირებულებებისადმი საქართველოს ერთგულების თაობაზე", — აცხადებენ ისინი.

სენატორების თქმით, მიმდინარე მოვლენებმა, მათ შორის, რეფორმების კუთხით პროგრესის ნაკლებობამ და შიდა დაპირისპირებამ, შესაძლოა, კარი გაუღოს რუსეთს და ის უფრო მეტად ჩაერიოს ქვეყნის ცხოვრებაში.

"რაც უფრო დიდხანს გაგრძელდება ეს ქმედებები, უფრო დიდი საფრთხის წინაშე იქნება საქართველოს უსაფრთხოება და ჩვენ შეიძლება მოგვიწიოს ჩვენს პარტნიორობას გადავხედოთ", — წერენ ისინი.

გარდა ამისა, წერილში, სენატორები შეშფოთებას გამოთქვამენ საარჩევნო რეფორმის დაპირებისა და უკან წაღების, ოპოზიციის წარმომადგენლების წინააღმდეგ სისხლის სამართლის საქმეების გახსნისა და პროტესტის ჩახშობის თაობაზე. განსაკუთრებით შეშფოთებას კი ისინი სასამართლოს დამოუკიდებლობის საკითხზე გამოთქვამენ და მიაჩნიათ, რომ "პოლიტიკური მოკავშირების უზენაეს სასამართლოში დანიშვნა, ძირს უთხრის დემოკრატიიის პრინციპებს".

სენატის საგარეო ურთიერთობათა კომიტეტის თავმჯდომარის, რესპუბლიკელი ჯიმ რიშისა და ევროპის ქვეკომიტეტის უმცირესობის დემოკრატი ლიდერის, ჯინ შაჰინის წერილი საქართველოს მთავრობისადმი დღეს, 30 იანვარს გამოქვეყნდა. ეს სენატის საგარეო კომიტეტის მიერ საქართველოს მთავრობისთვის გაგზავნილი პირველი წერილია. აქამდე კრიტიკულ წერილებს მთავრობა ძირითადად კონგრესიდან იღებდა.

კრიტიკის პასუხად ქართული ოცნების წევრები ხაზს უსვამდნენ იმ ფაქტს, რომ საქართველოს ორპარტიული მხარდაჭერა აქვს და პარტნიორობას არაფერი ემუქრება. გარდა ამისა, ისმოდა განცხადებები კონგრესმენების მიკერძებულობაზე და მათ ტონით დაუწუნეს. მმართველ გუნდში ამბობდნენ, რომ საგულისხმო მათთვის მხოლოდ სახელმწიფო დეპარტამენტის და საელჩოს ოფიციალური განცხადებებია.

გაიგეთ მეტი სენატორების წერილზე:

გაიგეთ მეტი კონგრესმენების წერილებზე: