ქართული ოცნების გენერალური მდივანი და თბილისის მერი, კახა კალაძე ამბობს, რომ სტრატეგიული პარტნიორი მეგობარ ქვეყანას "ასე არ უნდა ესაუბრებოდეს". მისი თქმით, კრიტიკულად განწყობილი კონგრესმენების ტონი და განცხადებები კატეგორიულად მიუღებელია.

"განცხადებები, რომელსაც ჩვენ ვისმენთ ცდება ყოველგვარ ჩვენ მეგობრულ ურთიერთობას. ამერიკა იცით, რომ არის ჩვენი სტრატეგიული პარტნიორი ქვეყანა, შესაბამისად, სტრატეგიული პარტნიორის კანონმდებლები ასე არ უნდა ესაუბრებოდნენ მეგობარ ქვეყანას. ჯერ კიდევ ჩემი მინისტრობის დროს არსებობდა ეს პრობლემა და მე ძალიან კარგად ვიცი თუ რას წარმოადგენს ეს პრობლემა, ფრონტერა მაქვს მხედველობაში. ჩვენ დავიწყეთ საქმის წარმოება საერთაშორისო არბიტრაჟში და დარწმუნებული ვარ, ძალიან კარგად იციან, რომ ისინი აუცილებლად წააგებენ ამ საქმეს, და გააძლიერეს მათი ლობიზმი... კატეგორიულად მიუღებელია ეს ტონი და კატეგორიულად მიუღებელია ამ ტიპის განცხადებები", — თქვა კახა კალაძემ ჟურნალისტებთან საუბრისას.

კალაძემ აღნიშნა, რომ ისინი აუცილებლად დაიცავენ ქვეყნისა და სახელმწიფოს ინტერესებს.

გუშინ, 28 იანვარს რესპუბლიკელმა პიტ ოლსონმა კონგრესში სიტყვით გამოსვლის დროს საქართველოს ხელისუფლებას კორუფციისა და რუსული გავლენის დასრულებისკენ მოუწოდა. მან ბიძინა ივანიშვილი ამერიკული შოუს გმირს, გრაუჩ ოსკარს შეადარა, რომელიც ნაგვის ურნაში ცხოვრობს და უსარგებლო ნივთებს აგროვებს

24 იანვარს საქართველოს მთავრობამ კრიტიკული გზავნილები მიიღო აშშ-ს ორი კონგრესმენისგან. კონგრესმენმა ბრაიან ბაბინიმ დაწერა, რომ ქვეყნის ისტორიაში პირველად, საქართველო და ქვეყნისთვის გაწეული რესურსები საფრთხილო და ნეგატიურ კონტექსტში განიხილება. კონგრესმენმა პიტ ოლსონმა კი განაცხადა, რომ კორუმპირებული საქართველოს მთავრობა თავს ესხმის დემოკრატიულ ღირებულებებს.

ამერიკელმა კონგრესმენებმა საქართველოს პრემიერ-მინისტრს რამდენიმე კრიტიკული წერილი მისწერეს, რომელშიც სხვადასხვა საკითხს ეხმიანებიან, მათ შორის ანაკლიის პორტს, ოპოზიციის ლიდერების წინააღმდეგ მიმდინარე გამოძიებებს, არჩევნებსა და მედიას.

26 იანვარს, ერთიანმა ნაციონალურმა მოძრაობამ სენატორ როჯერ ვიკერის წერილი გაასაჯაროვა. მათი თქმით, წერილი სენატორმა გიორგი გახარიას დეკემბრის თვეში გამოუგზავნა. გასაჯაროებულ წერილში სენატორი აღნიშნავს, რომ წარმატებული დემოკრატიული წინსვლასთან დაკავშირებით ბოლოდროინდელ მოვლენებზე შეშფოთებულია.