საპარლამენტო უმრავლესობის წევრი და ვიცე სპიკერი, გია ვოლსკი ამბობს, რომ ოპოზიციისთვის არც პროპორციული საარჩევნო სისტემა არ არის მისაღები. მისივე თქმით, ოპოზიციასთან მოლაპარაკებების ფორმატი უნდა გაგრძელდეს, რადგან გამოჩნდეს, ვინ რას სთავაზობს ქვეყნის მომავლისათვის.

"ეჭვი მაქვს, რომ საერთოდ არცერთი ვარიანტი მისაღები არ არის. არც პროპორციული არ არის მისაღები, ახლა გამიჩნდა ეს შეკითხვა და ნელ-ნელა ეს შეკითხვა გადადის გარკვეულ დასტურში. მეხუთე რაუნდი უნდა შედგეს იმიტომ, რომ სულ მცირე საზოგადოებამაც, საერთაშორისო პარტნიორებმაც და ორგანიზაციებმაც უნდა დაინახონ, რომ რეალურად ვინ რას სთავაზობს იმისათვის, რომ ქვეყანაში შენარჩუნებული იქნეს სტაბილურობისა და განვითარების პერსპექტივა"— განაცხადა გია ვოლსკიმ.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. იანვრის ბოლოს, მოლაპარეკებათა მეხუთე რაუნდი უნდა გაიმართოს. მმართველმა გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.