მთავარი არხი ავრცელებს ვიდეომასალას, რომელშიც ჩანს, თუ როგორ აკავებს საპატრულო პოლიციის თანამშრომელი მაშინდელი შინაგან საქმეთა მინისტრის მოადგილის, ლევან იზორიას ძმას და როგორ აიძულებენ მის გათავისუფლებას ჩარევის შემდეგ. ვიდეო ტელევიზიას იმ პოლიციელმა მიაწოდა, რომელმაც 2014 წელს იზორიას ძმა დააკავა.

კადრებში ჩანს, როგორ უხსნის პოლიციელი გიორგი დვალიშვილი მაღალჩინოსნის ძმას, რომ საჯარო სივრცეში არ უნდა იგინებოდეს, რამაც ის გააღიზიანა და გინება გააგრძელა. ამის შემდეგ პოლიციელი მას განუმარტავს, რომ წვრილმანი ხულიგნობისთვის აკავებს, რაზეც პასუხად იღებს: "მიდი დავაი". თუმცა, მას შემდეგ, რაც პოლიციელი მისკენ ბორკილებით მიდის ის გაკვირვებულია, წინააღმდეგობას უწევს მას და ამბობს, რომ ლევან იზორიას ძმა არის. პოლიციელი მას პასუხობს, რომ არ აინტერესებს ვინ არის და მანქანაში სვამს.

გაღიზიანებული დაკავებული მანქანაში პოლიციელების დაცინვას და დამცირებას იწყებს.

"იცი ვინა ვარ? აი, შენნაირებს ფორმას ვხდი მე. გაიგე? სახლში უნდა დაჯდე შენ საერთოდ. ეს არაადამიანები ბიჭო, თქვენ როგორ გატუტუცებულხართ. ეს რაც გააკეთეთ თქვენ ამაზე იცი რა უნდა გიქნათ კაცმა? მე არ დაგინდობთ თქვენ. რას გიზამთ იცი?" — ეუბნება ის პოლიციელებს.

ვიდეოში ჩანს, რომ მანქანაში ჯდება საპატრულო პოლიციის სხვა თანამშრომელი, რომელიც დაკავებულს იცნობს. მისი საუბრიდან ირკვევა, რომ მსგავსი ინციდენტები პირველად არ ხდება.

გარდა ამისა, გიორგი დვალიშვილთან მიდის სხვა საპატრულო პოლიციის თანამშრომელი და ეუბნება, თუ ვინ არის დაკავებული, რაზეც პასუხად იღებს, რომ ის უზრდელურად მოიქცა და ამიტომ დააკავა.

კადრებში ასევე ჩანს, რომ მანქანაში სხვა პოლიციის თანამშრომლები სხდებიან, რომელსაც დაკავებული "უნამოსოებსა" და "ნამუსგარეცხილებს" ეძახის. ერთ-ერთი პოლიციელი ეკითხება თუ რატომ ამბობს ამას და ამატებენ, რომ "მრავლობითში ნათქვამი ცოტა ცუდად ჟღერს".

მოგვიანებით კადრებში ჩნდება პირი, რომელიც მთავარი არხის ინფორმაციით, ლევან იზორიას პირადი მძღოლი იყო. ის საპატრულო პოლიციელებს ესაუბრება. ვიდეოში ჩანს, რომ საუბრის შემდეგ დაკავებულს ათავისუფლებენ.

გათავისუფლებისას პოლიციელი ცდილობს ფრთხილად მოხსნას იზორიას ძმას ბორკილები, რომ "არ ეტკინოს" და ეუბნება მას, რომ "ერთმანეთს ყველაფერი აპატიონ" რაზეც პასუხად იღებს:

"არა, ძმაო, არა. რამდენჯერ გაპატიოთ. მე მაპატიეთ თქვენ რამე? მე სულ გპატიობთ".

გათავისუფლების შემდეგ იზორია ნიშნისმოგებით ეუბნება ერთ-ერთ პოლიციელს, რომ დაკავების ოქმი გამოუწეროს, რაზეც პასუხად იღებს:

"შენც ხომ იცი, რატომ ხდება ეს ამბავი. ჩემი ნება რომ იყოს, აი, იმ წუთში წაგიყვანდი ნარკოლოგიურში და გინდა მიჩივლე და რაც გინდა ის გააკეთე".

ამის შემდეგ ჩანს, რომ პოლიციელები, იზორიას ძმა და მძღოლი ერთმანეთს ემშვიდობებიან.

მთავარი არხის ინფორმაციით, მომხდარის შემდეგ დვალიშვილს მაშინდელმა საპატრულო პოლიციის უფროსმა, კახა ბუქრაძემ ვიდეომასალის გადაგზავნა მოსთხოვა, რაზეც უარი უთხრა და განუმარტა, რომ ვიდეოს გამოძიებას გადასცემდა. მისი თქმით, ამის შემდეგ დევნა დაიწყო და ის ჩამოაქვეითეს.

დვალიშვილი ყვება, რომ მას სიმართლის გარკვევაში არავინ დაეხმარა და შსს მის წინააღმდეგ წავიდა, ამიტომ ვიდეომასალა პროკურატურას მიაწოდა და სახალხო დამცველსაც მიმართა. მისი თქმით, უწყებამ გამოძიება სამი თვის წინ დაიწყო, თუმცა საქმე "თაროზე შემოდო".

ის განმარტავს, რომ მომხდარი მისთვის მარტივი აღსაქმელი არ ყოფილა, რადგან პოლიციის საქმიანობა მისთვის მნიშვნელოვანი და საამაყოა.

"ამ პიროვნებას პრობლემა არ ქონია გიორგისთან, ანუ ჩემთან როგორ პიროვნებასთან, მას პრობლემა ჰქონდა სახელმწიფოსთან, იმ პოლიციის ფორმასთან, რომელიც მე ამდენი წელი მაცვია და ყოველთვის სიამაყით ვემსახურე. აქედან გამომდინარე ამას არ ვაპატიე ის უპატივცემულობა, რომელიც გამოხატა პოლიციელის მიმართ...

შერჩევით ვერ დავიწყებ ბოდიში მისვლას და კითხვას, თქვენ ვინმეს ძმა ხომ არ ბრძანდებით, ამის ძმა ხომ არა ხართ, იმის მამიდაშვილი ხომ არა ხართ. ეს ხომ მიუღებელია", — ამბობს დვალიშვილი.

პოლიციელი ამბობს, რომ მისი ცოლი შინგან საქმეთა სამინისტროში მუშაობს და შიშობს, რომ ამ ვიდეოს გამოქვეყნების გამო შეიძლება მისი ოჯახის წინააღმდეგ დევნა დაიწყოს.

სახალხო დამცველის აპარატში On.ge-ს განუცხადეს, რომ დვალიშვილის საქმეს აქამდე შრომით ურთიერთობებში დისკრიმინაციის კუთხით სწავლობდნენ და აღნიშნულ ვიდეომასალაზე ინფორმაცია არ ჰქონდათ. მათი თქმით, გავრცელების შემდეგ ვიდეომასალის შესწავლა ცდაიწყეს.

რაც შეეხება შსს-სა და პროკუირატურას, On.ge მათ ინფორმაციის გადასამოწმებლად და იმის გასარკვევად დაუკავშირდა, თუ რა რეაგირება მოჰყვა მომხდარს. მათ პასუხს მიღებისთანავე შემოგთავაზებთ.