ილონ მასკსა და დონალდ ტრამპს შორის ურთიერთობა, რომელიც ერთ დროს ურთიერთპატივისცემას ეფუძნებოდა, ბოლო დროს აშკარად დაიძაბა. მასკმა სოციალურ ქსელ X-ზე გაავრცელა პოსტი, რომელშიც გამოკითხვას ატარებს: "დროა, რომ ახალი პარტია დაარსდეს, რომელიც ხალხის 80%-ის ინტერესებს ემსახურება?"

ეს პოსტი ერთ-ერთია მასკის მხრიდან ტრამპის მთავრობისადმი მიმართული კრიტიკული შინაარსის განცხადებებიდან. მას შემდეგ, რაც მასკმა თეთრი სახლის მთავრობის ეფექტურობის დეპარტამენტის (DOGE) ხელმძღვანელის პოზიცია დატოვა, ყოფილი მოკავშირის მიერ მიღებულ გადაწყვეტილებების ხმამაღალი განსჯა დაიწყო.

რამდენიმე დღის წინ მასკმა მკაცრად გააკრიტიკა აშშ-ის ბიუჯეტის ახალი კანონპროექტი, რომელსაც ტრამპი "დიდსა და მშვენიერს" უწოდებს. მისი თქმით, ეს ბიუჯეტი მნიშვნელოვნად გაზრდის აშშ-ის ფინანსურ დეფიციტს და ამერიკელებს "დამანგრეველ" ვალში ჩააგდებს.

"სირცხვილი მათ, ვინც ამ კანონპროექტს მხარი დაუჭირა," — დაწერა მასკმა. ამ განცხადებამ პოლიტიკურ სივრცეში მძლავრი ტალღა გამოიწვია, მაგრამ უფრო საინტერესო ის იყო, რომ მასკის გზავნილები აშკარად კრიტიკულ ტონს ატარებდა ტრამპის მიმართაც. მან უკვე არაერთხელ დაადანაშაულა ტრამპი ბიზნესსექტორის გარკვეული სფეროების – მათ შორის Tesla-ს – უგულებელყოფაში, განსაკუთრებით მაშინ, როცა საუბარი იყო სამთავრობო კონტრაქტებსა და საგადასახადო შეღავათებზე. მასკი ასევე ღიად საუბრობდა ტრამპის პოლიტიკური სტრატეგიის "ხარვეზებზე", რამაც შექმნა შთაბეჭდილება, რომ ორი ფიგურის პოლიტიკური ინტერესები აღარ ემთხვევა ერთმანეთს.

თავის მხრივ, ტრამპმა არ დააყოვნა საპასუხო ნაბიჯით. მან მასკს „არასტაბილური“ უწოდა და გააკრიტიკა მისი პოლიტიკური ჩარევების მცდელობებისთვის. ტრამპმა განაცხადა, რომ სწორედ მისი გავლენით დატოვა მასკმა ერთ-ერთი მრჩევლის პოზიცია და რომ თეთრი სახლის ადმინისტრაცია მომავალში განიხილავს Tesla-სა და SpaceX-ისთვის სამთავრობო მხარდაჭერის შეწყვეტას. ეს საფრთხე მასკის კომპანიებისთვის სერიოზული გამოწვევაა, განსაკუთრებით მას შემდეგ, რაც ტესლას აქციების ღირებულება რამდენიმე დღის განმავლობაში მკვეთრად დაეცა, სავარაუდოდ სწორედ ამ დაპირისპირების გამო.

გარდა პოლიტიკისა, კონფლიქტი უკვე აშკარად პირად ხასიათს იღებს. მასკმა ტრამპის მიმართ არაერთი სარკასტული პოსტი დაწერა — "დროა, დიდი ბომბი ჩამოვაგდო. ტრამპი ეპშტეინის ფაილებშია. ესაა რეალური მიზეზი, რის გამოც ინფორმაცია არ გასაჯაროებულა. კარგ დღეს გისურვებ, დონალდ ჯონ ტრამპ!" — დაწერა მასკმა და ტრამპი ჯეფრი ეპშტეინის, პროსტიტუციაში არასრულწლოვანთა ჩართვაში, სექსუალურ ძალადობასა და ტრეფიკინგში დამნაშავე ფინანსისტის წრეში ჩართულობაში დაადანაშაულა.

როგორ გაგრძელდება ეს კონფლიქტი – გამწვავდება თუ გადაიზრდება თანამშრომლობაში – ჯერ რთული სათქმელია. თუმცა ერთი რამ ცხადია: ილონ მასკი და დონალდ ტრამპი უკვე აღარ საუბრობენ ერთ ენაზე.