გასულ ხუთშაბათს აშშ-ის ფედერალურმა სააპელაციო სასამართლომ ქვედა ინსტანციის გადაწყვეტილება შეცვალა და პრეზიდენტ დონალდ ტრამპის მიერ დაწესებული სავაჭრო ტარიფები დროებით აღადგინა. სააპელაციო სასამართლომ არ მიუთითა გადაწყვეტილების მიზეზი და მოსარჩელეებს პასუხის წარდგენის ვადა 5 ივნისამდე მისცა.

ეს ნიშნავს იმას, რომ სააპელაციო სასამართლომ დააკმაყოფილა ტრამპის ადმინისტრაციის საგანგებო მოთხოვნა, რომელშიც ნათქვამი იყო, რომ შეჩერება "მნიშვნელოვანია ქვეყნის ეროვნული უსაფრთხოებისთვის". მანამდე სავაჭრო სასამართლომ ტარიფების შემოღების საფუძველი გადაჭარბებულად მიიჩნია.

სააპელაციო სასამართლოს გადაწყვეტილების მიუხედავად, S&P 500-ის ინდექსი (SPX) დღის ბოლოს 0.4%-ით გაიზარდა. რაც შეეხება გაცვლით კურსს, დოლარი იენთან და შვეიცარიულ ფრანკთან მიმართებით დაეცა, რადგან ინვესტორებს სავაჭრო არასტაბილურობისა და მერყეობის მოლოდინი შეექმნათ.

რას ფიქრობენ ბაზრის ექსპერტები:

ანალიტიკოსები მიიჩნევენ, რომ არსებული მდგომარეობა პროგნოზების გაკეთებას მნიშვნელოვნად ართულებს. მათი თქმით, მოვლენები სწრაფად იცვლება და ბაზარი ცდილობს მიმდინარე ამბებს ფეხი აუწყოს. მათი ნაწილი ამბობს, რომ ინვესტორები მომავალზე არიან ორიენტირებულნი და სააპელაციოს გადაწყვეტილება ვერაფერს შეცვლის, რადგან "ტრამპმა ტარიფების უმრავლესობა ისედაც გააუქმა".

ზოგიერთი ანალიტიკოსი მიიჩნევს, რომ ბაზარი უკვე მიეჩვია ტარიფების თემას, რადგან საქმე გვაქვს ყოველდღიურ ცვლილებებთან, რომელსაც სხვადასხვა მხარე აპროვოცირებს. ისინი ამბობენ, რომ ტარიფებთან დაკავშირებით ბაზარი საბოლოო გადაწყვეტილებას ელოდება. სპეციალისტების შეფასებით, ინვესტორებს ერთადერთი რაც სჭირდებათ — სტაბილურობაა.

უცხოური მედიის ინფორმაციით, თეთრი სახლი ახალი 15%-იანი ტარიფების დაწესებას განიხილავს, რომელიც აშშ-ის სავაჭრო პარტნიორებს 150 დღით შეეხებათ. ტრამპი ამ შემთხვევაში 1974 წლის სავაჭრო აქტის ერთ-ერთ მუხლს ეყრდნობა.

ეს დროებითი ზომა ტრამპის ადმინისტრაციას მისცემს დროს, ამავე კანონის სხვა მუხლის გამოყენებით სავაჭრო პარტნიორებისთვის კონკრეტული ტარიფების გეგმები შეიმუშაოს. ანალიტიკოსები ამბობენ, რომ პროცესი გრძელი და რთული იქნება, თუმცა ის ტარიფებს ბევრად მყარ იურიდიულ საფუძველს შესძენს. მათივე ცნობით, თეთრ სახლში ამ საკითხზე მსჯელობა კვლავ გრძელდება.

2 ივნისის ვაჭრობის შედეგად, S&P 500 ინდექსი 0.4%-ით გაიზარდა და 5,935.94 პუნქტზე დაიხურა. მიუხედავად იმისა, რომ დღის დასაწყისში დაახლოებით 1%-იანი ვარდნა დაფიქსირდა, ინდექსმა დღის ბოლოს ტექნოლოგიური კომპანიების გაძლიერების ფონზე აღდგენა შეძლო. არსებული ინფორმაციით, წლის დასაწყისთან შედარებით S&P 500 ინდექსი 1.27%-ით, ხოლო წლიურად 12.73%-ით არის გაზრდილი. აღსანიშნავია, რომ მაისში ინდექსმა 6.2%-იანი ზრდა აჩვენა — მსგავსი მაჩვენებელი 1990 წლის შემდეგ მაისში არ დაფიქსირებულა.

გახსენი საინვესტიციო ანგარიში თიბისის მობაილბანკში და შეიძინე ამერიკული აქციები და ფონდები საკომისიოს გარეშე. გაითვალისწინე, რომ ეს არ არის ფინანსური რჩევა.